Комплекс Корея халықаралық бирге ислесиў агентлиги - KOICAның 9 миллион долларлық грант қаржылары есабынан қурылған. Заманагөй кәсиплер ушын зәрүр үскенелер, симуляциялық үскенелер алып келинип орнатылған. Бул жерде автомобиллерге техникалық хызмет көрсетиў, кепсерлеў, жүк көтериў машинистлиги, электрон ҳәм турмыслық техника оңлаўы, мебель қурылысы, шаштәрезлик ҳәм косметология, мобилография ҳәм мийманхана хызмети сыяқлы 10 талап жоқары қәнигелик үйретиледи.
Буның ушын дерлик 2 гектар аймақта заманагөй оқыў имаратлары, әмелий шынығыў ханалары, 64 орынлық жатақхана ҳәм басқа да жәрдемши имаратлар қурылған. Мәкеме жылына 300 тыңлаўшыны 6 айлық кәсиплик таярлық курсларында оқытыў имканиятына ийе.
Президент оқыў-шынығыў ханаларын кирип көрди. Мийманхана бағдарында сабақ алып атырған жаслар менен қызғын сәўбетлести.
- Үргенш аэропортын Инчон аэропорты менен шерикликте дүнья дәрежесине алып шығамыз. Үлкен туризм орайлары, мийманханалар қурып атырмыз. Енди сырт елли туристлердиң көп келиўи ушын хызмет те халықаралық дәрежеде болыўы керек. Олар тарийхымыз, тәбиятымыз ушын келеди, сервис жақсы болса, қуўанып кетеди. Бунда көп нәрсе хызмет көрсетиўшилердиң мүнәсибети, этикасы, дәрежесине байланыслы. Соның ушын бул имканияттан пайдаланып, кәсипти жақсы үйрениң. Келешекте өзиңиз де исбилермен болыўға ҳәрекет етиң, - деди Шавкат Мирзиёев.
Орайда Миграция агентлиги және Кореяның Hyundai ҳәм Германияның SBH West пенен биргеликте электромобиллерге хызмет көрсетиў қәнигелиги де жолға қойылған. Бул болса ишки ҳәм сыртқы мийнет базарының талапларына сәйкес кадрлар жетистириў имканиятын береди.
Халықаралық бирге ислесиў кең жолға қойылған. Усы жылдың январь айында орайдың басқарыў хызметкерлери Корея Республикасында 2 ҳәптелик оқыў курсларын тамамлап қайтқан. Ҳәзирги ўақытта болса бул мәмлекетте 20 дан аслам оқытыўшы ҳәм устазлар тәжирийбе арттырмақта.
Мәмлекетимиз басшысы маман кәсиплик таярлық санаатласыў, улыўма, мәмлекет раўажланыўының тийкары екенин атап өтти. Әмелият үскенелеринен нәтийжели пайдаланыў, сабақ сменаларын ақылға уғрас шөлкемлестирип, көбирек жасларды оқытыў бойынша көрсетпелер берилди.
Президентимиз Хорезмге сапарын жуўмақлап, Ташкентке қайтып келди.
