Өзбекстан Республикасы Президентиниң "Статистика жумысларын шөлкемлестириў ҳәм жүргизиў системасын жаңа басқышқа алып шығыў бойынша қосымша илажлар ҳаққында"ғы Пәрманы (ПП-27-санлы, 24.02.2025 ж.) қабыл етилди.
Пәрманға бола, Президент жанындағы Статистика агентлиги Миллий статистика комитети сыпатында қайта шөлкемлестириледи.
Статистика жумысларының нәтийжелилигин буннан былай да арттырыўдың төмендеги тийкарғы бағдарлары белгиленди, атап айтқанда:
- макроэкономика ҳәм тармақлар дәрежесинде статистикалық бақлаў өткериў системасын және олардың методологиясын халықаралық стандартлар ҳәм усынысларға муўапық жетилистирип барыў;
- интеграция процесслерин кеңейтиў арқалы статистикалық есабатларды қысқартыў ҳәм бизнеске есабат тапсырыў жүгин азайтып барыў;
- "мәҳәлледен - республикаға шекем" принципи бойынша статистикалық көрсеткишлерди қәлиплестириў системасын жаратыў арқалы мағлыўматлардың исенимлилигин тәмийинлеў.
2025-жылдың ақырына шекем "Аймақлар статистикасы" мәлимлеме системасы иске қосылады.
2025-жылдың жуўмағы бойынша есап бериў дәўиринен баслап хызметкерлердиң саны жыллық орташа 5 адамнан аз болған ҳәм жыллық түсими БЕМның 2 000 есесине шекемги болған микрофирма ҳәм киши кәрханалар ушын жыллық статистикалық есабатты тапсырыў миннетлемеси бийкар етилип, ҳәр үш жылда бир мәрте статистикалық есабат тапсырылыўы белгиленди.
