Өзбекстан елшиханасында мәмлекетимиз Конституциясы қабыл етилгениниң 32 жыллығына бағышланған дөгерек сәўбети шөлкемлестирилди.
Илажда эксперт, академиялық ҳәм илимий топарлар және Россия ғалаба хабар қуралларының ўәкиллери қатнасты.
Конституция ҳәр бир мәмлекеттиң суверенитетин, оның мәмлекетшилигиниң раўажланыўын, пуқаралардың турмыс тәризин, жәмийеттеги орнын белгилеп беретуғыны және ғәрезсиз, еркин, тыныш ҳәм абадан турмыстың кепили, ҳуқықый демократиялық мәмлекет қурыўдың беккем тийкары болып хызмет ететуғыны атап өтилди.
Қатнасыўшыларға Өзбекстан биринши мәрте социаллық, дүньялық, ҳуқықый мәмлекет, инсан, оның өмири, еркинлиги, абырайы, қәдир-қымбаты ҳәм басқа да қол қатылмас ҳуқықлары жоқары қәдирият деп белгиленген Конституцияға киргизилген өзгерислер ҳаққында мағлыўмат берилди.
Сондай-ақ, елимиз халқының мәплеринен келип шығып экономикалық, социаллық, мәдений-ағартыўшылық турмыстың түрли тараўларында әмелге асырылып атырған өзгерислер ҳәм жаңалықлар ҳаққында айтып өтилди.
Шығып сөйлегенлер жаңаланған Конституцияның тийкарғы ҳуқықый нормалары инсан ҳуқықлары менен қәдир-қымбатын қорғаў, оның социаллық қорғалыўы ҳәм экономикалық абаданлығын тәмийинлеў кепилликлерин беккемлегенин атап өтти.
Россия эксперт ҳәм илимий топарларының ўәкиллери, сондай-ақ, Өзбекстанның дүнья жәмийетшилиги, әсиресе, қоңсы мәмлекетлер менен бирге ислесиў, өз-ара жәрдем, тынышлық ҳәм татыўлық тийкарында дослық қатнасықларын беккемлеў ҳәм раўажландырыў бағдарындағы ҳәрекетлерин жоқары баҳалады, деп хабар береди "Дунё" ХА.
