Фармацевтика өнимлери қәўипсизлиги орайы "Dr. Reddy's Laboratories Ltd" компаниясының Өзбекстан Республикасындағы ўәкилханасынан алынған рәсмий мағлыўматқа тийкарланып, бул жағдай бойынша жәмийетшиликке мүнәсибет билдирди.
Атап өтилиўинше, ислеп шығарыўшы тәрепинен өткерилген сапа қадағалаўы ҳәм турақлылық сынақлары нәтийжесинде "Телсартан H 80 мг/12,5 мг" препаратының С2501976 сериясындағы актив элемент - гидрохлортиазид муғдары белгиленген нормалардан аўысқанлығы анықланған. Демек, препараттың сапа көрсеткишлеринде теңсалмақлылық жоқ.
Соның менен бирге, Өзбекстан аймағында айланысқа шығарылған С2501977-сериясында актив заттың муғдары бойынша ҳеш қандай нуқсанлар анықланбаған. Бирақ, бул серия белгиленген муўапық емеслиги анықланған партия менен бирдей ислеп шығарыў лотының актив заты тийкарында таярланғанлығы себепли, ол да болыўы мүмкин болған қәўип-қәтерлердиң алдын алыў мақсетинде профилактикалық илаж сыпатында базардан шығарып алынады.
Қәнигелердиң атап өтиўинше, бул қарар пуқаралардың денсаўлығын сақлаў ҳәм дәри-дәрмақ қуралларының айланысы қәўипсизлигин тәмийинлеўге қаратылған.
Усы мүнәсибет пенен, усы сериядағы "Телсартан H 80 мг/12,5 мг" препаратын сатып алған пуқаралардан оны қабыл етпеўи, үй шараятында қолланыў мүмкин болса, қолланбаўы, емлеўди даўам еттириў бойынша емлеўши шыпакер менен мәсләҳәтлесип, алтернатив дәрини таңлап алыўы соралады.
Фармацевтика өнимлери қәўипсизлиги орайы халықты дәри-дәрмақлардан пайдаланыўда бәрқулла абайлы болыўға, оларды шыпакердиң усынысысыз қабыл етпеўге, бундай мағлыўматларды тек ғана рәсмий ҳәм исенимли дәреклер арқалы тексериўге шақырды.
Сондай-ақ, дәри-дәрмақ пенен байланыслы жағдайлар бойынша асығыс жуўмақлар шығармаў, түрли рәсмий емес дәреклерде тарқалып атырған дәлилсиз хабарларға исенбеў усыныс етилди.
