Усы бахытлы демлерде быйылғы Рамазан айын ҳәр тәреплеме мүнәсип өткерип, Ийд-ал-Фитрди ел-халқымыз бенен бирге мине усындай қуўанышта күтип алып атырғанымыз ушын Жаратқанға есапсыз шүкирлер айтамыз.
Әлбетте, түп мәнисинде инсаныйлық идеясы жәмленген муқаддес ислам дининиң жақсы қәдириятлары бүгинги күнде Жаңа Өзбекстанда әмелге асырылып атырған реформаларға қаншелли үнлес екени Рамазан айында және де айқын көринди, десек, әйне ҳақыйқатты айтқан боламыз.
Бул ҳаққында сөз болғанда, бәринен бурын, руўхый пәклениў, сабыр-қанаат, шүкиршилик, қайыр-сақаўат пазыйлетлери улығланатуғын бул айды миллий дәстүр ҳәм қәдириятларымызға сай түрде, жоқары дәрежеде өткериў, елимиз мусылманлары ибадат әмеллерин емин-еркин орынлаўы ушын барлық шараятлар жаратылғанын атап өтиў керек.
Әсиресе, бул мүбәрек айдың "Рамазан - сақаўат, тилеклеслик ҳәм кеңпейиллик айы" деген идея тийкарында өткерилгени жәмийетимизде тынышлық, дослық, мийрим-шәпәәт ҳәм сақаўат орталығын және де беккемлеўге хызмет етти.
Усы мақсетте кем тәмийинленген, жәрдемге мүтәж шаңарақлар, кекселер, майып ҳәм жалғыз адамлардың ҳалынан хабар алыў, кәмбағал адамлардың аўырын жеңиллетиў, үйлер ҳәм мәҳәллелерди абат етиў, үш әўлад ўәкиллериниң қатнасыўында ғалаба терек егиў, жаңа бағлар жаратыў бойынша көплеген қайырқомлық илажлары өткерилгенин атап өтиў зәрүр. Соның ишинде, республикамыз бойлап көп миллетли, көп конфессиялы мәмлекетимиз жәмийетшилиги ўәкиллерин бирлестирген ифтарлық мәресимлери бизиң күшимиз бирликте ҳәм аўызбиршиликте екенин және бир мәрте айқын көрсетти.
Кейинги жылларда жақсы дәстүрге айланған бундай мәресимлер инсан қәдирин улығлаў, мийнеткеш ҳәм кеңпейил халқымызды бирден-бир, татыў шаңарақ сыпатында бирлестириў бағдарында шексиз әҳмийетке ийе болып, биз бул жумысларды буннан былай да, әлбетте, даўам еттиремиз, деп ойлайман.
Ҳүрметли дослар!
Бәршеңизге белгили, ислам - бул бәринен бурын, адамгершилик, илим-пән, билим ҳәм ағартыўшылық, жақсы пазыйлетлерди улығлаў тәлийматы болып есапланады.
Усы бағдарда мәмлекетимизде ислам цивилизациясы ҳәм мәденияты тийкарында жаратылған бай илимий-руўхый мийрасты жыйнаў, үйрениў ҳәм кеңнен үгит-нәсиятлаўға соңғы жылларда үлкен итибар берилмекте. Әйне усы мақсетте елимизде жаңадан-жаңа илимий-ағартыўшылық орайлар, диний бағдардағы билимлендириў дәргайлары, қутлы зыярат орынлары қурылып, нәтийжели жумыс алып бармақта.
Әлбетте, булардың барлығы гөззал үлкемизде барлық тараў ҳәм тармақлар қатарында диний-ағартыўшылық турмыс та үзликсиз раўажланып атырғанынан дәрек береди. Бул жумысларда елимиз мөмин-мусылманлары, пүткил халқымыздың мүнәсип үлеси бар екенин атап өтип, буның ушын бәршеңизге шын жүректен миннетдаршылық билдиремен.
Мине усы қуўанышлы әййямда сырт еллерде ана ўатанға садықлық сезими менен жасап атырған ўатанласларымызды да Рамазан ҳайыты менен шын жүректен қутлықлап, оларға жақсы тилеклеримизди билдиремиз.
Бул уллы күнде дүньяның алыс-жақын үлкелериндеги мусылман үмметин де қызғын қутлықлап, олардың халықлары ҳәм мәмлекетлерине дослық сәлемимизди жоллаймыз.
Әзиз ҳәм ҳүрметли ўатанласлар!
Сиз, әзизлерди Рамазан ҳайыты менен және бир мәрте шын кеўлимнен қутлықлап, бәршеңизге беккем денсаўлық, бахыт-ығбал, шаңарақларыңызға қут-берекет тилеймен.
Рамазан айында еткен барлық жақсы нийет ҳәм дуўаларымыз қабыл болсын!
Алла таала жанажан Ўатанымыз ҳәм халқымызды өз панасында сақласын!
Ийд-ал-Фитр байрамы бәршемизге мүбәрек болсын!
Шавкат Мирзиёев,
Өзбекстан Республикасы Президенти
