Буннан соң Президентлер Оваль кабинетте сөйлесиў өткерип, Өзбекстан - АҚШ стратегиялық шериклик қатнасықларын буннан былай да кеңейтиў, сиясий сөйлесиўди беккемлеў, саўда-экономикалық, инвестициялық ҳәм мәдений-гуманитарлық бирге ислесиўди кеңейтиў мәселелерин көрип шықты.
Усы жылдың сентябрь айында Нью-Йорк қаласында жоқары дәрежеде ерисилген келисимлерди әмелге асырыўға айрықша итибар қаратылды.
Глобал ҳәм регионаллық әҳмийетке ийе актуал мәселелер, соның ишинде, Орайлық Азия ҳәм АҚШ арасында "С5+1" форматындағы бирге ислесиўди кеңейтиў бойынша пикир алысылды.
Өзбекстан басшысы Дональд Трампты ишки ҳәм сыртқы сиясатты әмелге асырыўдағы жоқары жетискенликлери менен қызғын қутлықлады. Кескин халықаралық ҳәм регионаллық келиспеўшиликлерди тыныш жол менен шешиўге қосқан жеке үлеси ҳәм ҳәрекетлери айрықша атап өтилди.
Дональд Трамп Өзбекстан жетекшисиниң күни кеше АҚШ ҳүкиметиниң ўәкиллери, АҚШтың ең ири компаниялары ҳәм қаржы институтларының басшылары менен болып өткен ушырасыў ҳәм сөйлесиўлердиң нәтийжели жуўмақларын қоллап-қуўатлады.
Жетекшилер биргеликтеги жойбарларды алға қойыў ушын институционаллық механизмлерди жаратыў ҳәм жетилистириў зәрүр екенлигин атап өтти.
Сөйлесиўлер жуўмағында мәмлекетимиз басшысы АҚШ Президентин өзине қолайлы мүддетте Өзбекстанға рәсмий сапар менен келиўге мирәт етти.
