Усы жылдың апрель айында Самарқанд қаласында болып өткен "Орайлық Азия - ЕА" биринши саммитиниң жуўмақлары бойынша ерисилген келисимлерди әмелге асырыў шеңберинде көп қырлы Өзбекстан-Европа бирге ислесиўин және де кеңейтиў мәселелери көрип шығылды.
Жетекшилер бүгин қол қойылған Өзбекстан Республикасы менен Европа Аўқамы арасында кеңейтилген шериклик ҳәм бирге ислесиў ҳаққындағы тарийхый келисимди жоқары баҳалады. Бул кең көлемли ҳүжжет тек ғана ҳуқықый тийкарларды кеңейтип қоймастан, ал Өзбекстанның ЕА менен бирге ислесиўиниң жаңа күн тәртибин қәлиплестиретуғыны атап өтилди.
Сондай-ақ, шөлкемге ағза мәмлекетлер менен, бәринен бурын, саўда, инвестиция, транспорт, энергетика, климат, жоқары технологиялар ҳәм мәдений-гуманитарлық тараўлардағы бирге ислесиўге күшли пәт бағышлайды.
Тәреплер Өзбекстанның Жәҳән саўда шөлкемине ағза болыўы бойынша ЕА менен еки тәреплеме сөйлесиўлер жуўмақланғанын да қоллап-қуўатлады.
Барлық дәрежедеги жедел ҳәм нәтийжели сөйлесиўлер ҳәм алмасыўлар үлкен қанаатланыўшылық пенен атап өтилди. Сапар алдында Өзбекстан делегациясы Европа Аўқамының "Глобал дәрўаза" екинши форумында қатнасты, күни кеше Бирге ислесиў кеңеси ҳәм Экономика, саўда ҳәм инвестициялар бойынша киши комитеттиң мәжилислери табыслы өткерилди.
Кеше ири биргеликтеги бизнес-форум өткерилген болса, бүгин Европаның жетекши компаниялары ҳәм қаржы структураларының басшылары менен ушырасыў болып өтти. Олардың жуўмағында энергетика, химия, әҳмийетли минераллар, логистика, тоқымашылық ҳәм фармацевтика тараўларында улыўма баҳасы 10 миллиард евродан аслам жаңа жойбарларды әмелге асырыў бойынша келисимлерге ерисилди. Бул салмақлы қосымша болып табылады.
Шерикликтиң жоқары пәтин сақлап қалыў ушын бирге ислесиўдиң институционаллық механизмлерин буннан былай да беккемлеў, инвестициялар, әҳмийетли минераллар, энергетика, транспорт, илим ҳәм билимлендириў тараўларында жаңа перспективалы жойбарларды әмелге асырыў зәрүр екенлиги атап өтилди. Исбилерменлик ҳәм гуманитарлық байланысларды беккемлеў ушын виза тәртиплерин әпиўайыластырыў әҳмийетли екенлиги атап өтилди.
Жетекшилер халықаралық күн тәртиби ҳәм регионаллық бирге ислесиўдиң әҳмийетли мәселелери бойынша да пикир алысты.
Ушырасыў жуўмағында Бирликтеги билдириў қабыл етилди.
