Өзбекстан-Пакистан стратегиялық шериклик қатнасықларын қабыл етилген "жол картасы" тийкарында және де кеңейтиў ҳәм беккемлеўдиң әҳмийетли мәселелери додаланды.
Ҳәр қыйлы дәрежедеги сөйлесиўлер жедел өтип атырғаны қанаатланыўшылық пенен атап өтилди. Өз-ара саўда көлеми, қоспа кәрханалар ҳәм тиккелей авиақатнаўлар көбеймекте. Карачи ҳәм Лахорда саўда үйлери шөлкемлестирилген.
Саўда-экономикалық, инвестиция ҳәм транспорт-коммуникация тараўларындағы кооперация жойбарлары менен бағдарламаларын жеделлестириў, соның ишинде, Трансаўған темир жолының қурылысын алға қойыўға айрықша итибар қаратылды.
Усы жылы өткерилиўи режелестирилген Ҳүкиметлераралық комиссия мәжилиси ҳәм бизнес форумды нәтийжели өткериў әҳмийетли екенлиги атап өтилди.
Өзбекстан ҳәм Пакистан жетекшилери халықаралық ҳәм регионаллық әҳмийетке ийе мәселелер бойынша да пикир алысты.
