Сапар етиўдиң тийкарғы мақсети еки мәмлекеттиң ҳуқық қорғаў тараўындағы бирге ислесиўин раўажландырыў, мәмлекетлер ишки ислер министрликлериниң тараўлық хызметлери арасында мәлимлеме алмасыўын жолға қойыў және Венгрия полициясының алдынғы тәжирийбеси менен танысыўға қаратылды.
Сапар етиў даўамында Өзбекстан Республикасы Ишки ислер министри Азиз Ташпулатовтың Венгрия Ишки ислер министри доктор Шандор Пинтер менен еки тәреплеме рәсмий ушырасыўы болып өтти.
Илаж даўамында тәреплер еки мәмлекет арасындағы шәртнамалық-ҳуқықый базаны жетилистириў, халықаралық терроризм, шөлкемлескен жынаятшылық, кибержынаятшылық ҳәм нәшебентлик затлардың нызамсыз айланысына қарсы гүресиў бойынша уйымлараралық жумысшы ушырасыўларын шөлкемлестириў, Ташкент қаласы Ишки ислер бас басқармасы ҳәм Будапешт қаласы Полиция басқармасы арасындағы бирге ислесиўди раўажландырыў, жәмийетлик илажлар ҳәм туристлик объектлерде қәўипсизликти тәмийинлеў бойынша тәжирийбе алмасыў және киберқәўипсизлик ҳәм санлы криминалистика тараўында бирге ислесиўди жолға қойыў бойынша мәселелерди додалады.
Ушырасыў жуўмағында Өзбекстан Республикасы Ишки ислер министрлиги ҳәм Венгрия Ишки ислер министрлиги арасында 2025-2026-жылларға мөлшерленген бирге ислесиўди раўажландырыў бойынша "Жол картасы"на қол қойылды.
Венгрияға сапар етиў даўамында Ишки ислер министрлиги делегациясы мәмлекеттиң ҳуқық қорғаў бағдарындағы алдынғы тәжирийбе ҳәм билимлендириў тараўы менен жақыннан танысты.
Соның ишинде, илаж даўамында мәмлекетимиз делегациясының Венгрия Миллий киберқәўипсизлик институтының баслығы доктор Лайош Сабо менен ушырасыўы өткерилди.
Ушырасыўда тәреплер ҳәзирги заман кибер қәўип-қәтерлерине мүнәсип қарсы турыў системасы, интернеттеги ҳүжимлер ҳәм ҳәдийселердиң алдын алыўға қаратылған уйымлараралық бирге ислесиў, кибержынаятларды таллаў усыллары және биргеликте оқыў курсларын шөлкемлестириў мәселелерин додалады.
Сондай-ақ, мәмлекетимиз делегациясы Будапешттеги Халықаралық ҳуқық қорғаў уйымлары академиясының жумысы менен де танысып, өзбекстанлы қәнигелер ушын халықаралық ҳәм қәнигелик курсларда шөлкемлестириў мәселелерине итибар қаратты.
Будапешт полиция басқармасының хызмет процесин үйрениў даўамында, Венгрия пайтахтының Smart City (Ақыллы қала) видеобақлаў системасы, жәмийетлик қәўипсизлик пенен байланыслы қәўиплерди болжаў ҳәм таллаў, оператив жағдайдан келип шыққан ҳалда полицияның күш ҳәм қуралларын дурыс бөлистириў сыяқлы система менен танысып, Ташкент қаласы Ишки ислер бас басқармасы ҳәм Будапешт қаласы Полиция басқармасының әмелий бирге ислесиўин беккемлеў мәселелери додаланды.
Өзбекстан делегациясы ағзалары Венгрияның Терроризмге қарсы гүресиў орайының жумысын үйренди. Процессте өзбекстанлы қәнигелер Венгрия әмелиятында радикалластырылған шахсларды анықлаў, халықаралық терроршылық топарларын әшкаралаў, олардың жумысын үйрениў ҳәм онлайн орталықта қәўип-қәтерлерди мониторинг етиў механизмлери менен танысты.
Сапар етиў даўамында Өзбекстан Республикасы Ишки ислер министрлиги делегациясы Венгрия Полиция академиясының жумысы менен танысты.
Академия басшысы доктор Эрнё Краузер менен алып барылған сөйлесиўлерде, полиция хызметкерлерин таярлаў ҳәм қәнигелигин арттырыў, Венгрия полициясы тәрепинен алып барылып атырған инновациялар ҳәм тәжирийбелерди Өзбекстан шараятында енгизиў, сондай-ақ, курсантлар ҳәм профессор-оқытыўшылар ушын стажировка шөлкемлестириў мәселелери додаланды.
Өзбекстан Республикасы Ишки ислер министрлигиниң Венгрияға рәсмий сапары еки мәмлекет арасында ҳуқық қорғаў бағдарында бирге ислесиўди буннан былай да беккемлеў ҳәм өз-ара исенимли қатнасықларды жоқары дәрежеге көтериўге хызмет етеди, деп хабар бермекте Ишки ислер министрлигиниң баспасөз хызмети.
