Усы Нызамның мақсети азық-аўқат қәўипсизлиги тараўындағы қатнасықларды тәртипке салыўдан ибарат.
Нызам нормалары халықтың азық-аўқат баҳасына ийе болған азық-аўқат өнимлери менен қәўипсиз аўқатланыўын тәмийинлеўге, нәтийжели базар механизмлерин қәлиплестириўге және азық-аўқат өнимлери ҳәм шийки затын ислеп шығарыўға байланыслы қолланылады.
Нызамда азық-аўқат қәўипсизлиги тараўындағы мәмлекетлик сиясаттың тийкарғы бағдарлары белгиленген.
Атап айтқанда, азық-аўқат өнимлерин тутыныўдың минимал нормаларына муўапық азық-аўқат өнимлери ҳәм шийки заттың айланыс резервин қәлиплестириў және халықты социаллық әҳмийетке ийе тийкарғы түрдеги азық-аўқат өнимлери менен жетерли муғдарда ҳәм үзликсиз тәмийинлеў имканиятларын кеңейтиў солардың қатарына киреди.
Буннан тысқары, мәмлекет азық-аўқат өнимлериниң нызамшылық ҳүжжетлеринде белгиленген санитариялық, ветеринария, ветеринария-санитариялық, фитосанитариялық қағыйдалар менен нормаларға муўапық ислеп шығарылыўын хошаметлейди.
Сыртқы экономикалық жумысты жеделлестириў, сондай-ақ, социаллық әҳмийетке ийе тийкарғы түрдеги азық-аўқат өнимлериниң экспорты ҳәм импорты арасындағы оптимал тең салмақлылықты сақлаў да азық-аўқат қәўипсизлиги тараўындағы мәмлекетлик сиясаттың бағдарларынан бири болып есапланады
Аўыл хожалығы министрлиги азық-аўқат қәўипсизлигин тәмийинлеў тараўында ўәкилликли мәмлекетлик уйым сыпатында белгиленбекте.
Оған республика атқарыў ҳәкимияты уйымлары ҳәм жергиликли атқарыў ҳәкимияты уйымларының азық-аўқат қәўипсизлиги тараўындағы жумысын муўапықластырыў, азық-аўқат өнимлери ҳәм шийки затын ислеп шығарыўға байланыслы жумысты қоллап-қуўатлаў бойынша усыныслар таярлаў, азық-аўқат қәўипсизлигине унамсыз тәсир етиўши факторларды үйрениў тийкарында азық-аўқат өнимлерин ислеп шығарыў процесслерин жетилистириў ҳәм раўажландырыўға байланыслы қысқа, орта ҳәм узақ мүддетли стратегияларды ислеп шығыў сыяқлы бир қатар ўәкилликлер берилмекте.
Сондай-ақ, Нызамда азық-аўқат өнимлериниң жетиспеўшилигине жол қоймаў бойынша мәмлекет тәрепинен қандай илажлар көрилиўи, азық-аўқат балансын қәлиплестириў, тутыныўшылардың ҳәм хожалық жүргизиўши субектлердиң азық-аўқат қәўипсизлиги тараўындағы ҳуқықлары менен миннетлемелери белгилеп қойылмақта.
Бул Нызам елимизде азық-аўқат қәўипсизлиги тараўындағы қатнасықларды тәртипке салыўшы нормаларды бирден-бир ҳүжжетке бирлестириў ҳәм системаластырыў, бул тараўдағы қатнасықларды комплексли ҳуқықый тәртипке салыўға хызмет етеди.
Додалаў жуўмағында Нызам сенаторлар тәрепинен мақулланды, деп хабар береди Олий Мажлис Сенаты баспа сөз хызмети.
