Салық ҳәм Бажыхана комитетлери, Орайлық банк ҳәм Республикалық товар-шийки зат биржасының оператив мағлыўматларына бола, Экономикалық изертлеўлер ҳәм реформалар орайы Өзбекстан Республикасы аймақларының исбилерменлик белсендилигин мониторинг етпекте.

Усы жылдың март айы жуўмақлары бойынша салық түсимлери өткен жылдың усы дәўирине салыстырғанда 54 процентке өсип, турақлы унамлы динамиканы көрсетти.

Түсимлердиң ең көп өсиўи Наўайы, Сырдәрья, Ташкент ҳәм Хорезм ўәлаятларында, сондай-ақ, Ташкент қаласында атап өтилип, орташа өсиў пәти 33 процентти қураған.


Дәрамат салығы бойынша түсимлер 15,2 процентке, мүлк салығы бойынша 10,7 процентке ҳәм жер салығы бойынша 33,8 процентке өскен.

Бажыхана төлемлери 19,5 процентке артты. Ең жоқары көрсеткиш Наўайы - 77,6 процент ҳәм Наманган - 64,2 процент ўәлаятларында бақланған.

Турақлы унамлы өсиў Ферғана ҳәм Самарқанд ўәлаятларында, сондай-ақ, Қарақалпақстан Республикасында да бақланып, түсимлер орташа 32 процентке өскен.

Сыртқы экономикалық көрсеткишлерди таллаў нәтийжелерине бола, товарлар экспорты 30 процентке артты. Экспорт жеткерип бериўдиң ең үлкен өсиўи Наўайы - 71,4 процент ҳәм Ташкент - 52,4 процент ўәлаятларында бақланған. Самарқанд (30,6%), Наманган (29,3%) ҳәм Бухара (27,2%) ўәлаятларында да өсиў бақланды.

Соның менен бирге, кредитлеўде сезилерли өсиў бақланды. Көрип шығылып атырған дәўирде коммерциялық банклер тәрепинен ажыратылған кредитлер көлеми 9,1 процентке артты. Ең жоқары өсиў Самарқанд ўәлаятында (+69,5%) атап өтилди. Бухара, Хорезм, Ферғана ҳәм Ташкент ўәлаятларында кредитлеўдиң өсиў пәтлери орташа 43 проценттен артқан.

Жеке меншик сектордың жедел раўажланып атырғанын жаңа хожалық жүргизиўши субъектлер санының сезилерли дәрежеде көбейип атырғаны да тастыйықлайды. Усы жылдың март айында 22 мың 443 жаңа кәрхана дизимнен өткерилди. Ең көп жаңа субъектлер Ташкент (2 276), Хорезм (2 035), Самарқанд (1 854), Ферғана (1 626) ўәлаятларында ҳәм Ташкент қаласында (4 759) дизимге алынған.

Өзбекстан Республикалық товар-шийки зат биржасындағы келисимлер көлеми 20,8 процентке артты. Биржа активлигиниң ең үлкен өсиўи Сырдәрья ўәлаятында жүз берип, бул жерде активлик 68,4 процентке өскен. Сондай-ақ, Сырдәрья, Бухара, Наўайы, Наманган, Сурхандәрья ўәлаятлары ҳәм Ташкент қаласында өсиўдиң орташа 33 процентке кеңейиўи атап өтилди.