Ушырасыўда Әмирликлердиң Masdar компаниясы басшысы Муҳаммад Жамил ал-Рамаҳий, Etihad Water & Electricity компаниясы басшысы Юсуф ал-Али ҳәм TAQA Water Solutions компаниясы басшысы Аҳмад ал-Шамсий де қатнасты.
Ушырасыў алдынан министр мәмлекетимиз жетекшисине БАӘ Президенти Шайх Муҳаммад Ол Наҳаян, Бас министри, Дубай Әмири Шайх Муҳаммад Ол Мактум, вице-президенти Шайх Мансур Ол Наҳаян ҳәм Абу-Даби Әмирлигиниң мийрасхоры Шайх Холид Ол Наҳаянның қызғын сәлемин жеткерди.
Өзбекстан - БАӘ дослық ҳәм стратегиялық шериклик қатнасықларын және де беккемлеў мәселелери додаланды.
Бирге ислесиў барлық бағдарларда жедел раўажланып атырғаны қанаатланыўшылық пенен атап өтилди. Товар алмасыўдың көлеми, қоспа кәрханалардың саны, авиақатнаўлардың саны турақлы артып бармақта. Жойбарлар портфели 20 миллиард долларға жетти.
Транспорт-логистика, азық-аўқат, кән-металлургия, энергетика ҳәм басқа да тийкарғы бағдарлардағы жойбарларды таярлаў ҳәм алға қойыў илажлары көрип шығылды.
Кейинги жыллары энергетика тараўында тек ғана Masdar компаниясы менен Өзбекстан аймақларында баҳасы 1,5 миллиард доллар болған 6 жойбар әмелге асырылды.
Бүгин Бухара ўәлаятында және бир қуяш электр станциясы ҳәм энергияны сақлаў системасы, Қашқадәрья ўәлаятында 600 миллион доллардан аслам қаржы есабынан усындай объектлердиң қурылысы басланды.
БАӘ компанияларының басшылары мәмлекетимиз басшысына самал электр станциясы ҳәм топлаў қуўатлықларын қурыў, гидроэлектр станцияларын қурыў режелери, тазалаў қурылмаларын жаратыў жумысларының барысы ҳаққында мағлыўмат берди.
