Дәстанлар ҳәм халық қосықларын атқарып халқымызға белгили болған бақсылардың жолын даўам етип киятырған жасларды көрип, көркем өнеримиздиң келешегине және де исенимимиз артады.
Гүлжамал Беркинбаева бақсышылық өнерине кишкенелигинен қызығып, өзи туўылып өскен Кегейли районындағы 11-санлы балалар музыка ҳәм көркем өнер мектебине қатнай баслайды. Он төрт жасында саз өнеринен тәлим алып баслаған қыз, бул жерде устазы Бердияр Сейтмуратовтан ала мойнақ дуўтарды шертиўди ҳәм қосық айтыўды үйрене баслайды. Қысқа ўақыттың ишинде дуўтар шертип, қосық айтыўды үйренген Гүлжамал таңлаўларда қатнасып, сыйлы орынларды ийелеўге миясар болады. Атап айтқанда, Кегейли районында болып өткен «Дәстан атқарыў шеберлиги» таңлаўында биринши орынды, Ақтуба аўылы жаслары арасында болып өткен «Бақсы ҳәм жыраўлар» таңлаўында екинши, «Зульфия избасарлары» таңлаўының районлық басқышында үшинши, «Бес баслама олимпиадасы» таңлаўының мәҳәлле жаслары арасында өткерилген басқышында биринши ҳәм сол таңлаўдың районлық басқышында да биринши орынды ийелеўге миясар болады. Әлбетте, бул жетискенликлер он төрт жасында анасының басламасы менен музыка мектебине барып, саз өнерин үйренген кишкене қыз ушын үлкен табыс болды.
Гулжамал 2023-жылы музыка мектебин тамамлап, Өзбекстан мәмлекетлик көркем өнер ҳәм мәденият институтының Нөкис филиалының бақсышылық ҳәм дәстаншылық қәнигелигине оқыўға тапсырып, мәмлекетлик грант тийкарында оқыўға қабылланады. Елимизге белгили устазлар, көркем өнер ғайраткерлери мийнет етип атырған дәргайда оған Зульфия атындағы мәмлекетлик сыйлықтың лауреаты, белгили бақсы Лола Махаммаддинова устазлық етип келмекте. Ол оқыўларынан жақсы баҳаларға үлгериў ҳәм бақсышылық өнери менен шуғылланыўы менен бирге илимий жумыслар менен де шуғылланып келмекте. Жазған илимий мақалалары менен Ғәрезсиз мәмлекетледиң дослық аўқамы шеңберинде 2023-жылы 11-февраль күни Ташкент қаласында болып өткен халықаралық илимий-әмелий таңлаўда қатнасып «Ең жақсы хызметлери ушын» көкирек белгиси менен сыйлықланды.
Усы жылдың 14-январь күни Президентимиздиң елимиз жаслары менен сәўбетлесиўинде қатнасқан жаслар қатарында Гүлжамал Беркинбаева да бар еди.
-Президентимиз бенен ушырасыўда қатнасқанымнан оғада қуўанышлыман. Ушырасыў даўамында Президентимиздиң биз жасларға деген итбарын көрип жүдә толқынландым. Ушырасыўда жаслар ушын үлкен имканиятлар есиклерин ашып, келешегимизге исенимимизди және де арттырды. Бул ҳәр бир жастың келешекке қарай исенимли қәдемлер таслап, жаратылған имканиятлардан дурыс пайдаланып, оқып билим алып, өнер үйренип, ел-халқымызға хызмет етиўи ушын үлкен түртки болды деп ойлайман. Мен де келешекте бақсышылық тараўын жетик меңгерип, көплеген жетискенликлерди қолға киргизип, Зульфия атындағы мәмлекетлик сыйлықтың ийеси болып, халқымыздың мақтаныш ететуғындай қызы болып жетисиўди алдыма мақсет етип қойғанман,-дейди ол.
Гулжамал быйыл оқыў дәргайының 3-курсында билим алмақта. Ҳәр күни устазының берген тәлими арқасында қолындағы аламойнақ дуўтары менен қарақалпақ халық дәстанларын ҳәм жаңа қосықлар атқарыўды үйренип атырған қыздың келешекке деген исеними мол. «Нийетиң жолдасың» дегениндей жақсы нийетлери өмирине жолдас болған бақсы қыздың табыслары айдын келешеги менен уласқай.
Гүлнара Турдышова, Қарақалпақстан хабар агентлиги.
