Салық ҳәм Бажыхана комитетлери, Орайлық банк ҳәм Республикалық товар-шийки зат биржасының оператив мағлыўматларына бола, Экономикалық изертлеўлер ҳәм реформалар орайы Өзбекстан Республикасы аймақларының исбилерменлик белсендилигин мониторинг етпекте.
Усы жылдың январь-октябрь айларының жуўмақларына бола, салық түсимлери турақлы унамлы өсиў пәтин көрсетип, өткен жылдың усы дәўирине салыстырғанда 17,4 процентке өсти.
Түсимлердиң ең көп өсиўи Наўайы, Ташкент ҳәм Сырдәрья ўәлаятларында, сондай-ақ, Ташкент қаласында атап өтилип, орташа өсиў пәти дерлик 40 процентти қураған.
Бажыхана төлемлери жыллық есапта 20 процентке артты. Ең жоқары көрсеткиш Сырдәрья ўәлаятында - 81 процент ҳәм Қарақалпақстан Республикасында - 43 процент.
Турақлы унамлы өсиў Наўайы, Ташкент, Наманган ўәлаятлары ҳәм Ташкент қаласында да бақланып, түсимлер орташа 25 процентке өскен.
Сыртқы экономикалық көрсеткишлерди таллаў нәтийжелерине бола, товарлар экспорты 14,3 процентке өскен. Экспорттың ең үлкен өсиўи Сурхандәрья ўәлаятында дерлик 80 процентке ҳәм Самарқанд ўәлаятында 39 процентке артқаны атап өтилди.
Соның менен бирге, кредитлеўде сезилерли өсиў бақланды. Көрип шығылып атырған дәўирде коммерциялық банклер тәрепинен ажыратылған кредитлер көлеми 39,6 процентке артқан. Ең жоқары өсим Сырдәрья (+85,2 процент) ҳәм Наманган (+51 процент) ўәлаятларында бақланған. Сондай-ақ, Бухара, Наўайы ўәлаятлары ҳәм Ташкент қаласында кредитлеўдиң өсиў пәти 40 проценттен артты.
Өзбекстан Республикалық товар-шийки зат биржасындағы саўда көлеми өткен жылға салыстырғанда 23,4 процентке артты. Елимиздиң көпшилик аймақларында, әсиресе, Қарақалпақстан Республикасында биржа активлигиниң өсиўи атап өтилип, 38,5 процентке артты. Сондай-ақ, Қашқадәрья ҳәм Бухара ўәлаятларында орташа 35 процентке өсиў бақланған.
