Сөйлесиўде еки мәмлекет басшылары бир-бирин ҳәм мәмлекетлеримиздиң дос халықларын бәҳәр әййямы - Наўрыз ҳәм мүбәрек Рамазан ҳайыты - Ийд ал-Фитр менен қызғын қутлықлап, тынышлық-татыўлық, абаданлық ҳәм раўажланыў тиледи.

Қабыл етилген "жол картасы" тийкарында көп қырлы Өзбекстан-Иран қатнасықларын буннан былай да раўажландырыўдың әҳмийетли мәселелери ҳәр тәреплеме көрип шығылды.

Ҳәр қыйлы дәрежелерде жедел сөйлесиўлер ҳәм сапар етиўлер даўам етип атырғаны қанаатланыўшылық пенен атап өтилди.

Өз-ара саўда ҳәм жүк тасыў көрсеткишлери, қоспа кәрханалардың саны артпақта, пайтахтлар арасында турақлы тиккелей авиақатнаўлар әмелге асырылмақта, исбилерменлик ҳәм мәдений-гуманитарлық алмасыў кеңеймекте.

Химия ҳәм нефть-химия тармақлары, тоқымашылық ҳәм азық-аўқат санааты, аўыл хожалығы, қурылыс материаллары тармағы ҳәм басқа да бағдарлардағы кооперация жойбарларын қоллап-қуўатлаў ҳәм жедел әмелге асырыўға айрықша итибар қаратылды.

Тегеран қаласында өткерилиўи режелестирилген Ҳүкиметлераралық комиссия мәжилиси, бизнес форум ҳәм санаат көргизбесин нәтийжели шөлкемлестириў әҳмийетли екенлиги атап өтилди.

Өзбекстан ҳәм Иран жетекшилери халықаралық ҳәм регионаллық әҳмийетке ийе мәселелер бойынша да пикир алысты.