2025-жылы Қытай ҳәм Орайлық Азия арасындағы экономикалық ҳәм саўда бирге ислесиўи үлкен табысларға ерисип, товар алмасыў көлеми 106,3 миллиард долларды қурады ҳәм жыллық есапта 12 процентке артты. Бул ҳаққында ҚХР Коммерция министрлиги тарқатылған баянатында мәлим етти.
Атап өтилиўинше, тарийхта биринши мәрте Қытай ҳәм Орайлық Азия арасындағы товар алмасыў 100 миллиард доллардан артты ҳәм избе-из бес жыл даўамында унамлы динамика көрсетпекте.
Өткен жылы Қытай биринши мәрте Орайлық Азия мәмлекетлериниң ең ири саўда шериги болды. Қытайдың Орайлық Азияға экспорты 71,2 миллиард долларды қурады, бул электромеханикалық өнимлер, сондай-ақ, жоқары технологиялық товарларды жеткерип бериўдиң сезилерли дәрежеде өсиўи есабынан бир жыл алдынғыға салыстырғанда 11 процентке көп. Орайлық Азиядан импорт 35,1 миллиард долларды қурап, жыллық есапта 14 процентке өскен.
Қытай ҳәм Орайлық Азия арасында трансшегаралық электрон коммерция форматындағы саўда жедел өсиў пәтлерин сақлап қалды, қоймахана ҳәм логистика объектлериниң қурылысы даўам еттирилди, трансшегаралық төлемлер тараўындағы бирге ислесиў жедел раўажланды.
"Мәкан ҳәм жол" басламасы шеңбериндеги жоқары дәрежедеги бирге ислесиў және де тереңлесип, сезилерли нәтийжелер берди. Өз-ара байланыслылық, үскенелер ислеп шығарыў, экологиялық таза пайдалы қазылмалар ҳәм заманагөй аўыл хожалығы сыяқлы тараўларда бир қатар ири жойбарларды әмелге асырыў жеделлестирилди, бул болса Орайлық Азияға экспорт көлемин кеңейтиўге нәтийжели хызмет етти, регион мәмлекетлерине санаатты модернизациялаў ҳәм экономикалық өсиўге жәрдемлести.
ҚХР Коммерция министрлиги келешекте саўда структурасын оптималластырыў, бизнестиң жаңа түрлерин раўажландырыў ҳәм жоқары дәрежедеги институционаллық механизмлерди жаратыўға жәрдемлесиўди даўам еттиретуғынын билдирди.
