Еки тәреплеме қатнасықлар жаңа басқышқа көтерилгени, еки мәмлекет арасындағы жоқары дәрежедеги жедел бирге ислесиў мәлимлеме технологиялары ҳәм басқа да тараўларда биргеликтеги жойбарларды әмелге асырыўға унамлы тәсир етип атырғаны атап өтилди.
Ҳәзирги ўақытта Өзбекстанда Саудияның DataVolt компаниясы тәрепинен ислеп шығылып атырған "жасыл" дата-орай жойбарын әмелге асырыўға айрықша итибар қаратылды. Ушырасыў шеңберинде жойбардың ҳәзирги жағдайы, сондай-ақ, оны раўажландырыўдың кейинги басқышларының перспективалары көрип шығылды.
Министр Шерматов Саудия Арабстаны менен биргеликтеги басламалар басқа да халықаралық шериклер ушын нәтийжели ҳәм өз-ара пайдалы бирге ислесиўдиң үлгиси бола алатуғынын атап өтти.
Сондай-ақ, сөйлесиўлерде Саудия базарының өсиўи ҳәм онда дүньяның жетекши компанияларының қатнасыўы додаланды. Бул компанияларды Өзбекстан базарына тартыў, аралықтан хызметлер экспортын кеңейтиў ҳәм IT Park Uzbekistan имканиятларынан пайдаланыў бойынша усыныслар көрип шығылды.
Өзбекстаннан халықаралық базарларға аралықтан хызметлер экспортын арттырыў мақсетинде бул бағдарларды биргеликте алға қойыў бойынша пикир алысылды. Биргеликтеги семинарлар ҳәм билимлендириў бағдарламаларын өткериў арқалы инсан капиталын беккемлеўге айрықша итибар қаратылды.
