Илажды Экология, қоршаған орталықты қорғаў ҳәм климат өзгериўи министри Азиз Абдуҳакимов ашып берди ҳәм 2023-жыл октябрь айында Самарқандта болып өткен Бас Ассамблеяның 25-сессиясына басшылық еткен мәмлекет - Өзбекстан атынан шығып сөйледи.
"Президент Шавкат Мирзиёев туризмге тек ғана экономика тараўы емес, ал Өзбекстанды дүньяға, дүнья Өзбекстанды дүньяға ашыўшы қурал сыпатында баҳа берди. Бирлескен Миллетлер Шөлкеминиң туризм бойынша 25-бас ассамблеясының тарийхый Самарқандта өткерилиўи Президентимиздиң басламаларынан бири болды. Соннан берли биз үлкен жетискенликлерге еристик: 97 мәмлекет пуқаралары Өзбекстанға визасыз келе алады, буннан бир неше жыл бурын олардың саны тек ғана 9 еди. Ҳәптесине 700 ден аслам халықаралық рейслерге 50 ге шамалас сырт ел ҳәм 16 миллий авиакомпания тәрепинен хызмет көрсетиледи. Нәтийжеде халықаралық туристлердиң саны 2023-жылдағы 6,6 миллионнан 2024-жылы 10 миллионнан асламға жетти ҳәм усы жылы 15 миллионнан аслам туристти қабыл етиўди режелестиргенбиз", - деп атап өтти А.Абдуҳакимов.
Сондай-ақ, министр авиация ҳәм инфраструктураға инвестиция киргизиў әҳмийетли екенлигин атап өтти: республика 22 жаңа Dreamliner самолётын сатып алыўға 8 миллиард доллар инвестиция киргизбекте ҳәм Саудия Арабстаны менен биргеликте Орайлық Азияның транспорт системасын өзгертиўши 2,5 миллиард долларлық жаңа Ташкент халықаралық аэропортын қурмақта.
Билимлендириў ҳәм инновацияларға айрықша итибар қаратылмақта: UN Tourism ҳәм Швейцарияның Les Roches мектеби менен биргеликте Самарқандта дүнья туризм индустриясының болажақ жетекшилерин таярлайтуғын Халықаралық туризм академиясы шөлкемлестирилген. Стратегияда турақлы раўажланыў орайлық орын ийелейди - "Адамлар, планета, абаданлық" принциплерине тийкарланған Миллий туризм стратегиясы ислеп шығылмақта.
"Биз 2027-жылды Халықаралық турақлы туризм жылы, деп жәриялаў бойынша БМШ резолюциясына баслама бергенимизден мақтанамыз. Сондай-ақ, Өзбекстан БМШтың Қәўипсиз туризм бойынша халықаралық кодексиниң басламашысы сыпатында қатнасып, глобал исеним ҳәм қәўипсизлик стандартларын алға қойған ҳалда Ҳүкиметлераралық комитеттиң баслығы етип сайланды. Буннан тысқары, ески Жипек жолының мийрасын байланыслылық ҳәм улыўмалық абаданлық белгиси сыпатында қайта тиклеў мақсетинде Жипек жолында Жәҳән туризм шөлкеминиң Тематикалық офиси ашылды", - деп атап өтти министр.
Сөзиниң жуўмағында Азиз Абдуҳакимов туризм келешеги ҳаққындағы Ар-Рияд декларациясын қоллап-қуўатлап, тараўды раўажландырыўда жасалма интеллекттиң әҳмийетли орын ийелейтуғынын, экономикалық өсиў ҳәм мәдений алмасыўлар ушын жаңа имканиятлар жаратыўда Орайлық Азия ҳәм Жақын Шығыс арасындағы бирге ислесиўди беккемлеў зәрүрлигин атап өтти.
Жуўмақлаў мәресиминде Пүткил жер жүзилик туризм шөлкеми Бас Ассамблеясының 26-сессиясына басшылық рәсмий түрде Саудия Арабстаны Патшалығына өтти.
