Сөйлесиў ўақтында Өзбекстан Президентиниң АҚШқа сапары даўамында «Uzbekistan Airways» ҳәм «Boeing» арасында қол қойылған тарийхый келисимниң әҳмийети атап өтилди. Сондай-ақ, «Boeing», Өзбекстан Транспорт министрлиги ҳәм «Uzbekistan Airways» арасындағы бирге ислесиўди кеңейтиў режелери таныстырылды.
Тәреплер «Boeing» компаниясы тәрепинен ислеп шығылған интерактив онлайн моделден пайдаланған ҳалда СО2 шығындыларын қысқартыў бойынша перспективалы шешимлерди додалады.
Делегацияларға "Өзбекнефтгаз" компаниясының кәрханалары, соның ишинде, Jet A-1 авиация жанылғысы ислеп шығарылатуғын Бухара нефтти қайта ислеў заводы, сондай-ақ, Бухара нефтти қайта ислеў заводы ҳәм Uzbekistan GTL кәрханаларының қоспа өнимлери - Jet A-1 SSF ярым синтетикалық жанылғысы ҳәм GTL керосини таныстырылды.
Атап өтилиўинше, 2022-жыл сентябрь айында «Boeing» компаниясы коммерциялық рейслер ушын Jet A-1 ярым синтетикалық жанылғысынан пайдаланыўды рәсмий түрде мақуллады.
Сөйлесиўлер ўақтында турақлы авиация жанылғысын (SAF) ислеп шығарыў перспективалары, сондай-ақ, SO₂ шығындыларын турақластырыў ҳәм азайтыў бойынша бирге ислесиў бағдарлары көрип шығылды.
Ушырасыў жуўмағында «Boeing» компаниясы ўәкиллери "Өзбекнефтгаз" компаниясының ярым синтетикалық авиация жанылғысын ислеп шығарыў ҳәм қолланыў тараўындағы жетискенликлерин халықаралық илажларда таныстырыўды усыныс етти. Буннан тысқары, тәреплер шерикликти буннан былай да раўажландырыў ушын биргеликтеги жумысшы топарды дүзиўге келисип алды.
