Заманагөй технологиялар тийкарындағы жойбардың улыўма баҳасы 15 миллион долларды қурайды. Кәрхана дүньяға белгили «H&M» бренди ушын таяр кийим-кеншек ислеп шығарыўға қәнигелескен.
Өнимлер ишки ҳәм сыртқы базарға бағдарланған. Ҳәзирги ўақытта Россия, Пакистан, Қазақстан, БАӘ, Иран, Қырғызстан сыяқлы мәмлекетлердиң ири компаниялары менен саўда келисимлери дүзилген.
Завод иске қосылыўы нәтийжесинде 500 ден аслам жаңа жумыс орны жаратылды. Жойбар толық қуўатлылық пенен иске қосылғаннан соң, жумыс орынларын 3,5 мыңға жеткериў режелестирилген. Сондай-ақ, компания басшылары хызметкерлерге қолайлы мийнет шараятын жаратыў мақсетинде оқыў орайлары ҳәм медициналық пунктлер ашыўды режелестирмекте.
Дәслепки есап-санақларға бола, фабрика толық қуўатлылық пенен иске қосылғаннан соң, жыллық экспорт көлеми 30 миллион долларға жетеди. Бул жергиликли халық ушын мыңлаған жумыс орынларын жаратып ғана қоймастан, елимиздиң сыртқы саўда айланысына да үлкен үлес қосады.
Жойбардың әҳмийети сонда, ол Өзбекстанның тоқымашылық ҳәм жеңил санаатында заманагөй өндирис қуўатлықларын раўажландырыў, өнимлердиң түрин көбейтиў ҳәм халықаралық базарда миллий брендлерди беккемлеўге хызмет етеди.
Мәмлекетимиз басшысы тәрепинен белгиленген тийкарғы ўазыйпалардан бири жергиликли өндирис қуўатлықларын кеңейтиў, тиккелей сырт ел инвестицияларын тартыў ҳәм экспорт өнимлериниң көлемин арттырыўдан ибарат. Ферғанада фабриканың ашылыўын усы мақсетлерге ерисиў жолындағы әҳмийетли қәдемлерден бири, деп айтыў мүмкин.
