Қарар менен төмендеги тәртиплер белгиленди:
мәмлекетлик емес суд-экспертиза шөлкемлериниң жумысын шөлкемлестириў;
мәмлекетлик емес суд-экспертиза шөлкемлерин мәмлекетлик дизимнен өткериў бойынша мәмлекетлик хызмет көрсетиў;
мәмлекетлик емес суд экспертлери болыў тилегин билдирген шахсларды қайта таярлаў, мәмлекетлик емес суд экспертлериниң маманлығын ҳәм ҳуқықый билимлерин арттырыў;
кәсиплик компетентликти тастыйықлайтуғын сертификат алған шахслардың бирден-бир реестрине мәмлекетлик емес суд экспертлерин киргизиў бойынша мәмлекетлик хызмет көрсетиў;
Өзбекстан Республикасы Әдиллик министрлиги жанындағы Эксперт-қәнигелик комиссиясының жумысын шөлкемлестириў.
Қарарда белгиленгениндей, енди мәмлекетлик емес суд-экспертиза шөлкемлери коммерциялық емес шөлкем сыпатында жумыс алып барыўы, сондай-ақ, жеке тәртиптеги суд-экспертлик бюросы тәризинде шөлкемлестирилиўи мүмкин.
Алдын мәмлекетлик емес суд-экспертиза шөлкемин шөлкемлестириў ушын кеминде 3 суд экспертиниң болыўы талап етилетуғын еди.
Сондай-ақ, бул ҳүжжет пенен тараўда биринши мәрте мәмлекетлик емес суд-экспертиза шөлкемлерин мәмлекетлик дизимнен өткериў бойынша мәмлекетлик хызметлерди автоматластырылған система арқалы көрсетиў жолға қойылды.
Оған муўапық, оқыў режеси ҳәм оқыў әмелияты бағдарламалары ислеп шығылып, оқыў процесиниң 40 проценти теориялық, 60 проценти әмелий бөлимге ажыратылады; оқыў процесиниң теориялық бөлими тийисли мәмлекетлик билимлендириў мәкемесинде, әмелий бөлими болса тийисли мәмлекетлик суд-экспертиза мәкемесинде тыңлаўшылар ушын шөлкемлестириледи.
Соның менен бирге, бул ҳүжжет тийкарында мәмлекетлик емес суд экспертлериниң кәсиплик таярлық дәрежесин анықлаў ҳәм олардың жумысына қалыс баҳа берилиўин тәмийинлеў мақсетинде Әдиллик министрлиги жанында Эксперт-қәнигелик комиссиясының жумысын жолға қойыў тәртиби белгиленбекте.
