Режеге муўапық, қамсызландырыў жағдайлары жүз бергенде қамсызландырылған шахсларға төмендеги төлемлер төленеди:
2026-жыл 1-январьдан баслап - ҳәмиледарлық ҳәм туўыў напақасы;
2026-жыл 1-июльден баслап - ўақтынша мийнетке жарамсызлық напақасы.
Қамсызландырыў жағдайы жүз бергенде қамсызландырылған шахсларға төлемлер төмендеги шәртлер тийкарында тайынланады:
мәмлекетлик социаллық қамсызландырыў бойынша төлемлерди алыў ҳуқықы, егер қамсызландырыў жағдайы:
қамсызландырылған шахслар жумыс бериўши менен мийнет қатнасықларында болған дәўирде;
юридикалық ямаса физикалық шахслар менен дүзилген пуқаралық-ҳуқықый шәртнамалар тийкарында хызмет көрсетиў дәўиринде;
нызам ҳүжжетлеринде белгиленген тәртипте басқа рәсмий жумыс пенен шуғылланыў дәўиринде;
егер қамсызландырыў стажы ҳәмиледарлық ҳәм туўыў напақасын алыў ушын кеминде 10 ай ҳәм ўақтынша мийнетке жарамсызлық напақасын алыў ушын кеминде 6 айды қураса.
Ўақтынша мийнетке жарамсызлық напақасын төлеў мийнетке жарамсызлық қағазында көрсетилген барлық дәўир ушын, бирақ бир календарь жыл даўамында 182 календарь күнинен көп болмаған дәўир ушын әмелге асырылады.
Ҳәмиледарлық ҳәм туўыў напақасының муғдарын есаплаўда орташа айлық мийнет ҳақыға қамсызландырылған шахстың қамсызландырыў стажына пропорционал рәўиште төмендеги стаж коэффициенти қолланылады:
егер қамсызландырыў стажы 10 айдан 24 айға шекем (соның ишинде, 24 ай) болса - 75 процент;
егер қамсызландырыў стажы 25 айдан 60 айға шекем (60-айын қоса) болса - 85 процент;
егер қамсызландырыў стажы 61 айдан баслап болса - 100 процент.
Мәмлекетлик социаллық қамсызландырыў бойынша қамсызландырылған шахсларға тайынланған төлемлерди төлеў қаржы агенти тәрепинен әмелге асырылады.
