Режеге муўапық, егер наўқас тийисли жоллама болмаған жағдайда өз қәлеўи менен медициналық мәкемеге жобаластырылған медициналық жәрдем ушын мүрәжат етсе, медициналық жәрдем белгиленген тәртипте төлемли тийкарда көрсетиледи.
Бирлемши медициналық-санитариялық жәрдем мәкемелеринде мәмлекет тәрепинен көрсетилип атырған кепиллик берилген бийпул медициналық жәрдем пакетине кирмейтуғын хызметлер қосымша болып есапланады ҳәм төлемли тийкарда көрсетиледи.
Наўқас медициналық мәкемелердиң дизимге алыў бөлимлери тәрепинен қабыл етиледи ҳәм дизимге алынады.
Ҳәр бир қарыйдардың медициналық картасында оның шахсын тастыйықлаўшы мағлыўматлар тийкарында төлемли хызмет көрсетилгенлиги факты көрсетиледи.
Медицина мәкемелерине наўқаслар алдыннан толық төлемди әмелге асырыў шәрти менен қабыл етиледи.
Медицина мәкемелерине мүрәжат еткен шахслар тастыйықланған прейскурант бойынша ҳақы төленгеннен кейин қәниге-шыпакерге мәсләҳәт ҳәм (ямаса) инструменталлық-лабораториялық диагностика ушын жибериледи.
Тексериў нәтийжелери бойынша наўқасты тар қәнигеге жибериў ҳәм (ямаса) амбулаториялық ямаса стационар шараятта емлеў илажы белгиленеди.
