Бажыхана комитетиниң мәлим етиўинше, қосымша әпиўайы ҳәм қолайлы интерфейске ийе. Паспорт мағлыўматлары киргизилгеннен кейин декларацияның тийкарғы бөлимлери автомат түрде толтырылады. Пайдаланыўшыға тек ғана кириў ямаса шығыў мәмлекетин, алып өтилип атырған пул қаржылары, товарлар ҳәм басқа да затлар ҳаққындағы мағлыўматларды көрсетиў қалады.
Атап өтилиўинше, пуқараларға қолайлық жаратыў мақсетинде мобил қурылманың IMEI кодын автомат оқыў функциясы қосымшаға орнатылған. Декларацияға 15 таңбалы кодты қолда киргизиўдиң орнына, оны қосымша арқалы сканерлеў мүмкин.
Соның менен бирге, өткериў пунктлеринде инфокиоскалар орнатыў, жолаўшыларға сол жердиң өзинде декларация тапсырыў имканиятын жаратыў жумыслары да алып барылмақта. Буннан тысқары, бажыхана постларында мобил қосымша пайдаланыўшылары ушын бийпул Wi-Fi аймақлары шөлкемлестириледи.
Декларацияларды санлы түрде рәсмийлестириў Өзбекстанның туризм ушын ашық ҳәм технологиялы мәмлекет сыпатында халықаралық имиджин жақсылаўға хызмет етеди. Жолаўшылар декларацияны алдыннан - қәлеген ўақытта ҳәм қәлеген жерде, шегарада артықша иркилместен толтырыў имканиятына ийе болады.
Сондай-ақ, қосымшадан пайдаланыў қағаз декларацияларына тән болған қәтелердиң алдын алыў имканиятын береди: мағлыўматларды киргизиўдеги кешигиўлер, надурыслықлар, мағлыўматларды өткерип жибериў ямаса руқсат етилмеген дүзетиўлер.
"Жоллаўшы-декларациясы" қосымшасын Play Market ҳәм App Store арқалы жүклеп алыў мүмкин. "Ташкент" халықаралық аэропортында сынақтан өткериў басланды. 2025-жыл 1-ноябрьден барлық шегара пунктлеринде жаңа система толық енгизиледи.
Барлық илажлар Өзбекстан Республикасы Президентиниң 2025-жыл 25-марттағы ПП-57-санлы Пәрманына муўапық әмелге асырылмақта.