Туризм комитети ҳәм Өзбекстанның Япониядағы елшиханасы тәрепинен шөлкемлестирилген бул жойбар япониялы тамашагөйлерди Өзбекстан мәденияты ҳәм жетискенликлери менен таныстырыўға қаратылған.

Январь айында МБС телеканалының сүўретке алыў топары Өзбекстанға келди. Биринши көрсетиў Ташкент ҳаққында болып, онда баслаўшы Харука Маэда "Бес қазан" ас орайына барып, өзбек миллий тағамы - ас писириў процеси менен танысты.

Соң "Әлийшер Наўайы", "Космонавтлар" сыяқлы өзине тән архитектураға ийе Ташкент метрополитени бәндиргилерин көзден өткереди. Сондай-ақ, ол жолаўшылар менен сәўбетлесип, олардың метро ҳаққындағы пикирлерин үйренеди.

Көрсетиўдиң кейинги саны Самарқанд қаласы, оның "Регистан" комплекси, "Бибихоним" мешити ҳәм Сиёб базары сыяқлы тарийхый естеликлерине бағышланған. Сондай-ақ, Маэда тәбийий материаллардан буйымлар ислеўши өнерментлердиң шеберлигин айрықша атап өткен.

Бағдарламаның арнаўлы санлары тамашагөйлерден унамлы баҳа алды ҳәм 2025-жылдың 13-апрельинен 13-ноябрьине шекем Японияда өткерилетуғын "Ехпо Осака 2025" көргизбеси даўамында және көрсетилиўи күтилмекте.