Осы саланы реформалау бойынша жүргізілген жұмыстардың нәтижесінде соңғы үш жылда банктердің капиталы 1,8 есеге, ал жылдық несие бөлу 2 есеге артты. 4 банк алғаш рет «еурооблигация» шығарып, халықаралық капитал нарықтарынан 1 миллиард доллар ресурстар әкелді. Ипотекалық банкке стратегиялық шетелдік инвестор тартылды. 13 жаңа жеке банк құрылды, ел ішінде Венгрия, Қазақстан және Грузияның беделді банктері жұмыс істей бастады. Интернет-банкинг қызметтерінің көлемі 2,7 есеге өсті.
Сонымен бірге банк секторындағы бәсекелестік күшейіп, халық пен кәсіпкерлер тарапынан банктік қызметтерге сұраныс артып келеді. Бұл саладағы трансформация процестерін жеделдету алдағы жылдарға арналған басым міндеттерді анықтауды талап етеді.
Атап айтқанда, мемлекет үлесі бар банктерді жекешелендіруге дайындау, бағалы қағаздарын IPO-ға шығару, осы салаға тәжірибелі шетелдік сарапшыларды тарту жөнінде ұсыныстар айтылды.
Халықаралық рейтингтік компаниялармен ынтымақтастықты күшейту арқылы банктердің рейтингін арттыру бойынша орта мерзімді шараларды әзірлеу міндеті қойылды. Сондай-ақ саладағы кадр даярлау жүйесін уақыт талабына сай ретке келтіру керектігі айтылды.
Кездесуде банк басшылары трансформация мен жекешелендіруге дайындық, қызметкерлерді оқыту және салаға озық IT жетістіктерін енгізу жоспарларын жариялады.
Әрбір банк инвестиция салған жобаларына терең талдау жасап, олардың жүзеге асырылуын қадағалап, өңірлер мен салаларда тиімділігі жоғары жобаларды жүзеге асыруы керектігі баса айтылды.
