Осы саммитке дайындық аясында Үкіметаралық комиссия отырысы, бизнес-форум, Ректорлар форумы, Ұрпақтар диалогы және бірқатар мәдени іс-шаралар сәтті өткені айтылды.
Сауда, өнеркәсіптік кооперация, энергетика, көлік, ауыл және су шаруашылығы, қауіпсіздік, мәдениет және басқа да маңызды салалардағы ынтымақтастықтың нәтижелері сыни тұрғыдан талданды.
Келіссөздер барысында тараптар парламенттер, үкіметтер, министрліктер, ведомстволар мен өңірлер, кәсіпкерлер, сарапшылар және жұртшылық деңгейінде белсенді байланыстарды жалғастыруға келісті. Мемлекетаралық кеңес құру туралы шешім қабылданды.
Халықаралық және өңірлік құрылымдар, атап айтқанда, БҰҰ, ШЫҰ, Түркі мемлекеттері ұйымы, Орталық Азия елдері басшыларының Консультативтік кездесуі және басқа да көпжақты алаңдар аясында тығыз ынтымақтастықты жалғастыру қажеттігі айтылды.
Сауда көлемін ұлғайту бойынша, бірінші кезекте импортты алмастыру бағдарламалары мен ынтымақтастық жобаларын қолдау бойынша нақты шаралар талқыланды.
Осы мақсатта сапар барысында өзара сауда көлемін арттыруға бағытталған бағдарлама қабылданып жатыр. Сондай-ақ, алдағы жылдарда 2 миллиард долларға жету үшін астаналарда сауда үйлері құрылып, экспорт-импорттық келісімдер кешені қалыптасады, экспортты қаржыландыру құралдары енгізіліп, ауыл шаруашылығы және мал шаруашылығы өнімдерін жедел тасымалдауға арналған «жасыл дәліз» іске қосылады.
Өнеркәсіптік кооперация аясындағы ағымдағы жобалар қоржыны 300 миллион долларға жеткені айтылды. Кеше өткен бизнес-форум аясында энергетика, логистика, электротехника, тоқыма, агроөнеркәсіп және басқа да салалардағы сауда келісімдері мен инвестициялық келісімдердің жаңа кешені қабылданды.
Осындай жобаларды ілгерілету мақсатында Өзбекстан-Қырғызстан қорының жарғылық капиталы 200 миллион долларға дейін ұлғайтылады.
Энергетика саласындағы ынтымақтастық стратегиялық бағыт ретінде айқындалды.
Қамбарата ГЭС-1 құрылысы туралы келісімге тез арада қол қоюдың және жобаның практикалық кезеңін бастаудың маңыздылығы атап өтілді. Сондай-ақ екі елдің әлеуетін ескере отырып, шағын су энергетикасын дамыту бойынша кешенді ынтымақтастық бағдарламасы дайындалады.
Өңірдегі көлік байланысын нығайту бойынша бірлескен күш-жігерді жандандыру қажеттігі айтылды.
«Қытай-Қырғызстан-Өзбекстан» темір жолын салу жөніндегі стратегиялық жоба бойынша үшжақты келісімге қол қойылуы осы тұрғыда тарихи оқиға болды.
Кездесуде келешек көлік жобалары да талқыланды.
Екі елдің өңірлері сауда-экономикалық ынтымақтастықтың нақты драйверлері екені атап өтілді. Осы тұрғыда Премьер-Министрлердің төрағалығымен өтетін Шекаралық облыстар әкімдерінің кеңесі аясында белсенді қарым-қатынасты жалғастыруға келісілді.
Өңірлік делегациялардың өзара сапарларының кестесін дайындау және бірлескен «жол карталарын» жаңартуға келісілді.
Ауыл шаруашылығы өзара ынтымақтастықтың маңызды саласы. Ауыл шаруашылығы дақылдарын бірлесіп өсіру, интенсивті бау-бақша мен агрокластер құруды көздейтін агрокооперация бағдарламасын жүзеге асыруға келісілді.
Мәдениет, жастар, туризм, білім, ғылым және спорт салаларында белсенді алмасу жалғасады.
Осы тұрғыда сапар қарсаңында Самарқандта Өзбекстан мен Қырғызстан жоғары оқу орындары ректорларының екінші форумы сәтті өткені қуанышпен атап өтілді.
Алдағы жылдарға арналған мәдени шаралардың күнтізбесін дайындауға келісілді.
Жиында Премьер-Министрлер орынбасарларының баяндамалары тыңдалып, сауда-экономикалық ынтымақтастыққа қатысты нақты ұсыныстар айтылды.
Келіссөздер соңында Мемлекет басшылары бірлескен «жол картасын» дайындап, қол жеткізілген уағдаластықтарды тиімді жүзеге асыру тетіктерін белгілеу жөнінде тапсырма берді.
