Кездесу басында жоғары мәртебелі мейман Мемлекет басшысына Сауд Арабиясы Королі Салман бен Абдулазиз Әл Сауд пен мұрагер ханзада, Премьер-Министр Мұхаммед бен Салман Әл Саудтың сәлемдері мен ізгі тілектерін жеткізді.
Келіссөздер барысында жоғары деңгейде қол жеткізілген уағдаластықтарды жүзеге асыру аясында Өзбекстан мен Сауд Арабиясы арасындағы көпқырлы ынтымақтастықты және кең ауқымды серіктестікті одан әрі кеңейту мәселелері талқыланды.
Тараптар өзара тиімді серіктестіктің қарқынды дамып келе жатқанын атап өтті. Барлық деңгейдегі байланыстар белсенді түрде нығайып келеді. Екі ел арасындағы өзара сауда көлемі, тікелей инвестициялар мен бірлескен кәсіпорындар саны артуда. Сондай-ақ екі мемлекет арасындағы әуе қатынастары жиілеген.
Бірлескен жобалар портфелі бүгінде 27 миллиард долларға жетті. «ACWA Power» компаниясымен энергетика саласында жалпы құны 15 миллиард доллар болатын бірқатар ірі жобалар жүзеге асырылуда.
Жақында Ташкент қаласында өткен Үкіметаралық комиссия мен Кәсіпкерлер кеңесінің кезекті отырысының нәтижесі жоғары бағаланды. Осы кездесулер барысында жаңа келісімдер мен шарттар жасалды.
Сондай-ақ «жасыл» энергетика, ауыл шаруашылығы, электротехника, жылжымайтын мүлік, өңірлердің инфрақұрылымын жаңғырту және өзге де басым бағыттардағы жобалар мен бастамаларды жедел іске асыруға ерекше назар аударылды.
