Mazkur holat yuzasidan Favqulodda vaziyatlar vazirligi rasmiy munosabat bildirdi. Unda qayd etilishicha, vazirlik tomonidan yongʻin xavfsizligi va boshqa favqulodda holatlarning oldini olishga qaratilgan nazorat tadbirlari doimiy va tizimli ravishda amalga oshirib kelinmoqda.

Maʼlum qilinishicha, «Beshqoʻrgʻon» bozorida sodir boʻlgan yongʻindan soʻng nazorat choralarining kuchaytirilishi tekshiruvlar yangi boshlanganini emas, balki mavjud profilaktika ishlari yanada qatʼiylashganini anglatadi.

Xususan, yaqinda Toshkent shahridagi 4 ta bozorda oʻtkazilgan oʻrganishlar davomida yongʻin xavfsizligi qoidalari qopol ravishda buzilgani aniqlangan. Shu sababli ayrim bino va bloklar faoliyati kamchiliklar toʻliq bartaraf etilgunga qadar vaqtincha toʻxtatib qoʻyildi.

Vazirlik taʼkidlashicha, bunday nazorat tadbirlari tadbirkorlik subyektlarida yuzaga kelishi mumkin boʻlgan fojialar, yirik moddiy zarar va inson talafotlarining oldini olishga xizmat qiladi.

Amaldagi qonunchilikka koʻra, obyekt rahbarlari yongʻin xavfsizligi uchun bevosita masʼul hisoblanadi va mazkur talablarga rioya etmaganlik uchun maʼmuriy hamda jinoyiy javobgarlik belgilangan.

Shu munosabat bilan jamoatchilikdan turli xabarlarga tanqidiy yondashish va faqat rasmiy manbalarga tayanish soʻraldi.