Tadbirda Yevropa Ittifoqining Oʻzbekistondagi delegatsiyasi rahbari Sh.Adrian ham ishtirok etdi. Unda T. Hakala tomonidan Prezidentimiz Shavkat Mirziyoyev rahbarligida Oʻzbekistonning yangi mintaqaviy kursi tufayli mintaqada mutlaqo yangicha siyosiy muhit yaratilib, oʻzaro ishonch mustahkamlanayotgani, oʻzaro manfaatli hamkorlik aloqalari oʻrnatilayotgani alohida qayd etildi. Bularning barchasi, shubhasiz, Markaziy Osiyo davlatlari bilan ikki tomonlama va koʻp tomonlama hamkorlikni mustahkamlash yoʻlida “strategik imkoniyatlar oynasini” ochishga koʻmaklashadi. Uchrashuv davomida, oliy martabali mehmonga mamlakatimiz rahbari tashabbusi bilan tashkil etilgan Markaziy Osiyo xalqaro instituti va uning faoliyati xususida batafsil maʼlumot berildi. Unga koʻra, Institutning asosiy maqsadi Markaziy Osiyoda yaxshi qoʻshnichilik, barqarorlik va farovonlik muhitini yaratishda oʻzining amaliy taklif va tavsiyalarini ishlab chiqishdan iborat ekani qayd etildi. Shuningdek, turli sohalarda Oʻzbekiston va Yevropa Ittifoqi oʻrtasidagi munosabatlarning istiqbollari hamda mintaqaviy hamkorlik masalalari muhokama qilindi. Ahamiyatli tomoni shundaki, ayni paytda MOXI va Yevropa Ittifoqi mamlakatlaridagi nufuzli ilmiy tahlil markazlari oʻrtasida hamkorlik oʻrnatishga alohida eʼtibor qaratilmoqda. Uchrashuv yakunlari boʻyicha, qoʻshma dasturlar va tadbirlar, shu jumladan tadqiqot ishlari, seminarlar, konferensiyalar, shuningdek Markaziy Osiyo va Yevropa Ittifoqi mamlakatlari vakillari ishtirokida ekspert uchrashuvlarini tashkil etishga doir amaliy qadamlarni ishlab chiqish toʻgʻrisida kelishuvga erishildi.