Oʻzbekiston va YEI oʻrtasida “GSP+” preferensiyalarini qoʻllash boʻyicha hamkorlik masalalari muhokama qilindi

Xalqaro hamkorlik 6 okt 2021, 15:55 732

Bryussel shahrida Oʻzbekiston Respublikasi va Yevropa Ittifoqi oʻrtasida Kengaytirilgan sheriklik va hamkorlik toʻgʻrisidagi bitim (KSHHB) loyihasi yuzasidan muzokaralarning 9-raundida Oʻzbekiston delegatsiyasining ishtiroki doirasida Oʻzbekiston Respublikasi investitsiyalar va tashqi savdo vazirining oʻrinbosari B.Abidov Yevropa komissiyasi Savdo boʻyicha bosh direktoratining barqaror rivojlanish va iqtisodiy hamkorlik bitimlari boʻyicha direktori E.Zinoves bilan uchrashdi.

Oʻzbekistonda YEIning “GSP+” Preferensiyalar bosh tizimi imtiyozlarini qoʻllash va ushbu mexanizm doirasida Yevropa Ittifoqi bilan ikki tomonlama hamkorlik istiqbollari masalalari muhokama qilindi.

Oʻzbekiston uning Yevropa mamlakatlari bilan tashqi savdosini diversifikatsiya qilish va barqaror oʻsishiga mustahkam zamin yaratayotgan “GSP+” tizimi doirasida YEI davlatlari bilan ikki tomonlama savdo-iqtisodiy va investitsiyaviy hamkorlikni yanada mustahkamlashga alohida ahamiyat berayotgani taʼkidlandi.

Muzokaralar yakunida tomonlar Yevropa Ittifoqining “GSP+” Preferensiyalar bosh tizimi imtiyozlaridan samarali foydalanishda tadbirkorlarni qoʻllab-quvvatlash boʻyicha qoʻshma tashabbuslarni amalga oshirishga kelishib oldilar, deb xabar beradi Investitsiyalar va tashqi savdo vazirligi matbuot xizmati.

#YeI