Anjumanda soʻzga chiqqanlar taʼkidlaganidek, Oʻzbekiston charm-poyabzal sanoati soʻnggi 6 yil ichida ulkan sakrashni amalga oshirib, Markaziy Osiyo va MDHda yetakchi oʻrinlarni egalladi. Osiyo mintaqasida “Made in Uzbekistan” brendi ostidagi charm-poyabzal mahsulotlari ishonchli tarzda oʻz oʻrnini topib, koʻplab, jumladan, mintaqaning yetakchi ishlab chiqaruvchi davlatlari bilan raqobatlasha boshladi. Shu bilan birga, mamlakatni yanada rivojlantirish uchun hali katta zaxiralar mavjud. Bu borada jahon brendlarini Oʻzbekistonga keng jalb etish, Oʻzbekiston charm-poyabzal sanoatini jahon miqyosiga integratsiyalash dolzarb masaladir.
Shu nuqtai nazardan, xalqaro anjuman Oʻzbekistonning jahon charm-poyabzal sanoatiga integratsiyalashuvi yoʻlidagi amaliy qadamlardan biridir. Tadbirda AQSH, Italiya, Germaniya, Turkiya, Xitoy, Rossiya va boshqa mamlakatlarning mahsulotni sertifikatlash boʻyicha nufuzli xalqaro tashkilotlari, xalqaro koʻrgazmalar va milliy charm-poyabzal assotsiatsiyalari vakillari ishtirok etdi.
Bugun Oʻzbekiston poyabzal sanoati nafaqat arzon narxlarda, balki sifatli mahsulotlar ishlab chiqarayotganini barchaga yana bir bor isbotladi. Korxonalarda jahon ishlab chiqarish standartlari joriy etib borilyapti. Atrof-muhit va mehnatni muhofaza qilish, ishchilar uchun munosib sharoitlar yaratish va strategik boshqaruv alohida ustuvorliklarni oʻz ichiga oladi. Bularning barchasi boshqa koʻplab global brendlarning qadriyatlariga mos keladi.
Charmsanoat yoʻnalishida Oʻzbekiston butunlay yangi bosqichga koʻtarilgani alohida qayd etildi, deb xabar beradi “Oʻzcharmsanoat” uyushmasi matbuot xizmati.
