Masalan, Mirakiga borgan mehmon vaqtini qanday oʻtkazadi, nimalar xarid qiladi? Shu talablardan kelib chiqib, xizmatlar taklif qilish, bu yerning tabiati va sharoitini chet ellarda keng targʻib etish kerak degan edi davlatimiz rahbari Qashqadaryo viloyatiga tashriflarining birida.

Prezidentimiz joriy yilda viloyatga navbatdagi tashrifi chogʻida ham aynan Shah­risabz tumanidagi Hisor togʻ yonbagʻrida joy­lashgan sayyohlik hududlarida boʻldi. Bu sa­far islohotlar ijrosi, maqsadlar, rejalar samarasi koʻzga yaqqol tashlandi.

Davlatimiz rahbarining 2023-yil 28-noyabrdagi “Qashqadaryo viloyatining togʻli- rekreatsion hududlarida zamonaviy xizmat koʻrsatish va turizm obyektlarini barpo etish chora-tadbirlari toʻgʻrisida”gi qarori asosida ulkan ishlar bajarilmoqda.

Bugun Qashqadaryo viloyatida 1468 ta mod­diy-madaniy meros obyekti mavjud. Shundan 1197 tasi arxeologik yodgorlik, 208 tasi ar­xitektura, 35 ta monumental, 28 ta diqqatga sazovor obyekt.

Kitob tumanida shu yilning oʻzida ik­kita — Qaynar va Hazrati Bashir turizm qishloqlari tashkil etildi. Birgina Haz­rati Bashir ziyoratgohiga 2024-yilda 135 ming kishi ziyoratga kelgan boʻlsa, 2025-yil­da bu koʻrsatkich 150 mingga yetdi. Ularning 25 nafari chet el fuqarosi. Toʻgʻri, xorijlik sayyohlar soni juda kam, ammo bu manzil tu­ristlar uchun endigina ochilganini hisobga olish lozim. Ziyoratgohga keluvchilarga xiz­mat koʻrsatish uchun 120 ta xonadonda mehmon uyi tashkil etildi va roʻyxatdan oʻtkazildi. Bu bilan shu atrofda joylashgan Bodom­zor, Koyni, Hazrati Bashir qishloqlarida 120 tadan 150 tagacha ish oʻrni ochildi va shuncha odam ish bilan band boʻldi.

Davlatimiz rahbarining mazkur qaro­ri asosida Miraki, Amir Temur, Uloch va Polmon mahallalarida sayyohlar uchun qu­layliklar yaratilmoqda. Umumiy 240 gektar maydonda 400 million dollarlik 117 ta lo­yiha amalga oshirilayotir. Natijada 1700 ta doimiy ish oʻrni ochiladi.

Puxta oʻylangan rejaga asosan, kafelar, kottej tipidagi dam olish uylari, sogʻlom­lashtirish va oilaviy dam olish maskanla­ri, ekstrim park, oromgoh, motel va turizm komplekslari qurish uchun yer maydonlari auksionga qoʻyildi. Bugun barchasida quri­lish ishlari bajarilyapti.

Oqsuv daryosining ikki qirgʻogʻi boʻylab piyoda va velosipedda yurish uchun oʻn ki­lometrli “eko yoʻlak” yotqizildi. Bolalar maydonchasi, koʻngilochar bogʻ, nuroniylar maskani, oilaviy mehmon uylari hamda koʻch­ma savdo shoxobchalari mahalla koʻrkiga koʻrk qoʻshdi.

Ayniqsa, Mirakida yaqinda foydalanish­ga topshirilgan dor yoʻli yurtdoshlarimizga ham, xorijlik sayyohlarga ham birdek ekstre­mal kayfiyat baxsh etmoqda. Bu yirik loyiha “Miraki Ropeway” MCHJ buyurtmasi asosida “Gold Step Invest” MCHJ tomonidan amalga oshirildi. Loyiha qiymati 160 milliard soʻmni tashkil etib, dor yoʻli Avstriyaning mashhur Doppelmayr Seibahnen GmbH kom­paniyasi tomonidan ishlab chiqarilgan. Dor yoʻli tizimida 7 ta mustahkam minora, 20 ta 8 oʻrinli Carvatech kabinasi mavjud boʻlib, umumiy uzunligi 2084 metrni tashkil etadi. U har soatda 660 yoʻlovchini tashish imkoniya­tiga ega.

— Mahallamizda koʻz koʻrib, quloq eshitma­gan oʻzgarishlar boʻlyapti, — deydi mirakilik mehnat faxriysi Tursun Murodov. — Zamo­naviy mehmonxonalar, xostellar, agroturizm obyektlari, istirohat bogʻlari, dam olish mas­kanlari, sihatgohlar barpo etilyapti. Hamma xursand, kayfiyat koʻtarinki.

Dor yoʻlining pastki bekatida suvenir doʻkoni, kafe, tibbiyot punkti, ona va bola xonasi, bankomat, avtoturargoh, elektromo­billarni quvvatlash stansiyasi joylashgan. Yuqori bekatda esa mehmonlar uchun umumiy ovqatlanish shoxobchasi, bolalar oʻyin may­donchasi, tomosha hududlari, selfi uchun max­sus joylar tashkil etilgan.

— Mirakida oilaviy dam olish uchun har yil kelamiz, — deydi Shahlo Izzatova. — Le­kin bu yil kelib mutlaqo tanimadik. Juda katta oʻzgarishlar boʻlibdi. Ochigʻi, vaqtimiz qanday oʻtganini bilmay qolyapmiz. Qayiqda suv ombori boʻylab sayohat qilib, dor yoʻlida yuqoriga koʻtarildik. Farzandlarim bilan bu sayohatdan katta taassurot oldik.

— Nafaqat Mirakida, balki viloyati­mizning koʻplab hududida turizmni ri­vojlantirish borasida salmoqli ishlar qilinayotir, — deydi “Kitob-sayyoh” xusu­siy sayyohlik korxonasi rahbari Ahad Ber­diyev. — Albatta, bu manzilga koʻplab sayyoh­lar kelishi uchun barcha imkoniyat mavjud. Mirakida ham suv, ham togʻ, ham musaffo havo bor. Tabiati ajoyib. Biz mana shu joylarni ham targʻib qilyapmiz. Sayyohlik tashkiloti rahbari sifatida yurtimizda turizm sohasida qilinayotgan ishlarni qadrlayman. Bu loyiha­larning ortidan koʻplab ish oʻrinlari ochilyapti, qanchadan qancha xizmat koʻrsatadigan joylar tashkil etilyapti. Minglab odamlar ishlash, daromad topish imkoniyatiga ega boʻl­moqda. Ilgari mehmonlarni olib kelsak, daryo va togʻlardan boshqa joyni koʻrsata olmasdik. Endi esa maqtanadigan joylar bisyor.

Bu obodliklar bir kunda barpo etilmadi. Buning ortida qancha mehnat, islohot bor. Wi-Fi nuqtalari tashkil etildi, turistik toifadagi transport vositalari xizmati yoʻlga qoʻyildi, yoʻl belgilari oʻrnatildi. Qisqasi, bu hudud jahon standartlariga mos manzil boʻldi. 2024-yil sentyabrdan buyon haf­tasiga 2-marta Shahrisabz — Toshkent yoʻna­lishi boʻyicha 17 kishilik samolyot qatnovi yoʻlga qoʻyilgan edi. Joriy yil may oyidan ATR 72-600 rusumli havo kemalari haftada 4-marta qatnayapti.

2025-yilda xorijiy davlatlarda targʻibot dasturlari va “Road shou”lar tashkil etish, turizm forumlari va yarmarkalarida qatna­shish viloyat turizm salohiyatini oshirishda muhim oʻrin tutmoqda. Mahalliy turopera­torlar bilan hamkorlikda viloyatning ziyo­rat, eko, etno, gastro, tibbiyot va ekstremal turizm yoʻnalishlarida 70 ga yaqin turpaket oʻzbek, ingliz, rus tillarida ishlab chiqildi.

Shahrisabz tumanining Uloch mahallasi­dagi 520 gektardan iborat adirda terrasa usulida uzum, gilos va olma ekilgan ham­da oʻrmon barpo etilgan. Fransiyadan eng sara navlar koʻchati olib kelib oʻtqazilgan. Yiliga 7500 tonna mahsulot yetishtirish imkoniyatiga ega majmuaning eksport quvva­ti 5 million dollarga teng. 100 ta doimiy va mingdan ziyod mavsumiy ish oʻrni ochilgan. Koʻchatlar rivojini fransiyalik mutaxassis kuzatib boradi, yoshlarga dehqonchilik sir­lari va bozor talablarini oʻrgatadi. Hudud­da, shuningdek, 120 oʻrinli restoran va 100 oʻrinli mehmonxona qurilgan. Agrologis­tika va oʻquv markazi, qayta ishlash, saqlash quvvatlari qurilmoqda.

Qamashi tumanidagi “Maydanak baland togʻ” hududida keng koʻlamli qurilish va obo­donlashtirish ishlari jadal davom etmoqda. Yaqin kelajakda bu goʻzal maskanga keluvchi­lar nafaqat tabiatning betakror manzara­laridan bahramand boʻlish, balki tunlari yulduzlar va osmon jismlarini kuzatish, ekologik turizm yoʻnalishida dam olish, ma­daniy hordiq chiqarish imkoniyatiga ham ega boʻladi.

Maydanak musaffo havosi, beqiyos tabia­ti va osmonning ravshanligi bilan sayyoh­lar uchun betakror maskandir. Rejaga asosan astronomiya parki, bolalar oʻyingohi, gastro­nomiya obyektlari, restoran va umumiy ovqat­lanish joylari, premium tipdagi kottejlar, 1-2 qavatli mehmonxonalar va 200 oʻrinli meh­monxona hamda Glemping qurish ishlari uchun yer maydonlari auksion savdosiga qoʻyilib, qurilish ishlari boshlangan.

Bunday goʻzal manzillarni borib koʻrish uchun asosiy yoʻllar qayta yotqizilmoqda. “Olmaota — Bishkek — Toshkent — Shah­risabz — Termiz” xalqaro avtomobil yoʻ­lining Qashqadaryo viloyati Dehqonobod tu­manidan oʻtuvchi 60 kilometrli qismi toʻliq qayta qurilmoqda.

Mazkur loyihadan koʻzlangan asosiy maq­sad yoʻl infratuzilmasini zamonaviy ta­lablarga moslashtirish, transport oqimini yengillashtirish hamda mintaqaviy va xal­qaro aloqalarni yanada mustahkamlashdan iborat.

Ayni paytda qurilish ishlari jadal ba­jarilyapti. Qurilishga ilgʻor texnologiyalar va zamonaviy texnikalar jalb qilingan. Jarayonda xavfsizlik, sifat va ekologik meʼyorlarga qatʼiy rioya etilmoqda. Qurilish yakunlangach, ushbu yoʻl nafaqat mintaqadagi transport-logistika tizimini yengillashti­radi, balki haydovchilar va yoʻlovchilar uchun yanada xavfsiz, qulay va tezkor harakatlanish imkonini yaratadi. Shu bilan birga, iqtiso­diy faoliyatni rivojlantirish va hududla­raro integratsiyani kuchaytirishda ham muhim omil boʻladi.

Mazkur qayta qurilish ishlari Preziden­timiz tomonidan yoʻl-transport infratuzil­masini modernizatsiya qilish, zamonaviy va xavfsiz yoʻllar barpo etish borasida olib borilayotgan keng koʻlamli islohotlarning amaliy ifodasidir.

Gʻulom ABDIYEV,

Yozuvchilar uyushmasining

Qashqadaryo viloyati boʻlimi rahbari