Guliston tumanining Ahillik mahallasida istiqomat qilayotgan, 1976-yilda tug'ilgan Akromjon Mamatqulovga o'tkir buyrak etishmovchiligi tashxisi qo'yilib, Guliston tibbiyot klasterining nefrologiya va gemodializ bo'limiga yo'llanma berishdi. Ammo, bora-bora gemodializ muolajalari o'z samarasini bermay qo'yadi.

Shunda, uning 1974-yilda tug'ilgan opasi Gulbahor Muxtorova ukasi Akromjonga bir buyragini berishga qaror qiladi. Ma'lum bir tekshirish, shifokorlar xulosasidan so'ng, buyrak transplantatsiyasi bilan bog'liq yuqori texnologik jarrohlik amaliyoti o'tkazildi. Bu haqida Sirdaryo viloyat sog'liqni saqlash boshqarmasi matbuot xizmati xabar bermoqda.

Amaliyot Guliston tibbiyot klasterida o'tkazilib, V.Vahidov nomidagi respublika ixtisoslashtirilgan xirurgiya ilmiy-amaliy tibbiyot markaz xirurglari, sirdaryolik xirurglar hamrohligida olib borildi.

Ayni vaqtda opani, qolaversa, Akromjonni salomatligi ancha yaxshi. Ular o'z uyida, farzandlari oldida, shifokorlar nazorati ostida davo muolajalarini olyapti.

— Rosti, jondek jigaringni kundan-kunga so'lib borishini ko'rgach, na ko'zingga uyqu keladi, na bir qultum suv tomog'ingdan o'tadi, — deydi Gulbahor Muxtorova. — Ko'p ham o'ylab o'tirmadim, ukam, uning guldek farzandlari ko'z o'ngimdan o'tavergach, bir buyragimni berishga qaror qildim. Ko'rib turganingizdek, ukam, ukajonim sog'-salomat. Opa uchun har narsadan ko'ra, jigarini salomatligi muhimroq. Buning uchun shifokorlarga rahmat. Ular yordami sabab, men ukamga, ukam salomatlikka erishdi.

Eng asosiysi, xarajatlar Davlat tibbiy sug'urtasi jamg'armasi hisobidan qoplab berildi.