Farmatsevtika mahsulotlari xavfsizligi markazi “Dr. Reddyʼs Laboratories Ltd” kompaniyasining Oʻzbekiston Respublikasidagi vakolatxonasidan kelib tushgan rasmiy maʼlumotga tayanib, ushbu holat yuzasidan jamoatchilikka izoh berdi.
Maʼlum qilinishicha, ishlab chiqaruvchi tomonidan oʻtkazilgan sifat nazorati hamda barqarorlik sinovlari natijasida “Telsartan H 80 mg/12,5 mg” dori vositasining C2501976 seriyasida faol modda — gidroxlorotiazid miqdori belgilangan meʼyorlardan ogʻishgani aniqlangan. Bu esa preparatning sifat koʻrsatkichlari boʻyicha nomutanosiblik mavjudligini anglatadi.
Shu bilan birga, Oʻzbekiston hududida muomalaga chiqarilgan C2501977 seriyasida faol modda miqdori boʻyicha hech qanday kamchilik qayd etilmagan. Biroq mazkur seriya nomutanosiblik aniqlangan partiya bilan bir xil ishlab chiqarish lotiga mansub faol modda asosida tayyorlangani sababli, ehtimoliy xavflarni oldini olish maqsadida u ham profilaktik chora sifatida bozordan qaytarib olinmoqda.
Mutaxassislar taʼkidlashicha, bu qaror fuqarolar salomatligini himoya qilish va dori vositalari muomalasi xavfsizligini taʼminlashga qaratilgan.
Shu munosabat bilan, mazkur seriyaga tegishli “Telsartan H 80 mg/12,5 mg” preparatini xarid qilgan fuqarolardan uni qabul qilmaslik, agar uyda mavjud boʻlsa undan foydalanmaslik, shuningdek, davolashni davom ettirish masalasida davolovchi shifokor bilan maslahatlashgan holda muqobil dori vositasini tanlash soʻralmoqda.
Farmatsevtika mahsulotlari xavfsizligi markazi aholini dori vositalaridan foydalanishda doim ehtiyotkor boʻlishga, ularni shifokor tavsiyasisiz qabul qilmaslikka hamda bunday maʼlumotlarni faqat rasmiy va ishonchli manbalar orqali tekshirib olishga chaqirdi.
Shuningdek, dori vositalari bilan bogʻliq holatlar yuzasidan shoshma-shosharlik bilan xulosa chiqarmaslik va turli norasmiy manbalarda tarqatilayotgan tasdiqlanmagan xabarlarga ishonmaslik tavsiya etildi.
