Faxriddin Abduraximov:
2023-yil mart oyida men Google veb-sayti orqali dasturiy ta’minot muhandisi lavozimiga ariza topshirdim. Ko‘p o‘tmay, ishga yollovchi men bilan bog‘landi hamda biz 15-20 daqiqa davomida suhbat qildik. Suhbat davomida men o‘zimni tanishtirdim va nima sababdan Google kompaniyasini tanlaganim haqida umumiy ma’lumot berib o‘tdim. Shundan so‘ng, men bilan birinchi rasmiy suhbatni o‘tkazish rejalashtirildi. Umumiy hisobda 5ta suhbat bo‘lib o‘tdi.
Avgust oyida men Google kompaniyasi taklifini qabul qildim va viza olish jarayonlari boshlandi. Bularning barchasi men uchun unutilmas tajriba bo‘ldi.
Ushbu yutuqlarga erishishimda Toshkent shahridagi Inha universitetining hissasi katta deb hisoblayman. Bu yerda men nafaqat do‘stlar orttirdim va fundamental bilimlarni o‘rgandim, balki o‘z sohasining professionallaridan bebaho tajriba va bilimlarga ham ega bo‘ldim.
Dastlab Toshkent shahridagi Inha universitetiga topshirishimga sabab doimo yonimda bo‘lgan, qarorlarimni qo‘llab-quvvatlagan va qiyin damlarda yo‘l-yo‘riq ko‘rsatgan ota-onamning maslahatlari turtki bo‘lgan. Har bir ishda oilamning qo‘llab-quvvatlashi mening shaxsiy va kasbiy rivojlanishim uchun mustahkam poydevor bo‘lib kelgan va shunday bo‘lib qoladi.
— O‘z tajribangiz asosida talabalarga qanday maslahat berasiz?
Yaxshi o‘qing:
universitetda qurilgan poydevor sizning kelajakdagi martabangiz asosi bo‘ladi. Barcha algoritmik suhbatlarda nazariy (diskret matematika, chiziqli algebra) va amaliy (operasion tizimlar, ma’lumotlar bazalari) masalalarning optimal yechimlari muhokama qilinadi. Tizimlarni tahlil qilish kabi sohalardagi bilimlar kundalik hayotda foydali bo‘ladi.
ICPCda ishtirok eting:
Talaba dasturlash olimpiadasi (ICPC) algoritmik masalalarni hal qilishda kuchli tomonlaringizni sinab ko‘rish uchun noyob imkoniyatlarni taqdim etadi. Finalga chiqish nafaqat sizning ajoyib malakangizni tasdiqlaydi, balki ishga yollovchilarning e’tiborini tortadi. Bundan tashqari, men platformalarga e’tibor berishni tavsiya qilaman: Codeforces.com va Kaggle.com, bu yerda siz o‘z mahoratingizni namoyish qilishingiz va qiziqarli loyihalarda ishtirok etishingiz mumkin.
Hakatonlarda ishtirok eting:
Hakatonlar o‘zingizni turli rollarda sinab ko‘rish imkoniyatini beradi, masalan, ishlab chiquvchi, loyiha menejeri, UX/UI dizayneri va boshqalar. Bu, shuningdek, mahorat arsenalingizni kengaytirish uchun ham ajoyib imkoniyatdir.
Turli uchrashuvlar va konferensiyalarda ishtirok eting:
Uchrashuvlar, ma’ruzalar va konferensiyalarda ishtirok etish kelajakdagi martaba yo‘lingizda foydali bo‘lishi mumkin bo‘lgan professional tarmoqni yaratishga yordam beradi.
Yangi bilimlarga chanqoq bo‘ling:
Martaba yo‘li boshida barcha narsani bilmaslik bu odatiy holdir. Savollar berishga, fikr-mulohazalarni qabul qilishga va doimiy ravishda o‘z ustingizda ishlashga tayyor bo‘ling. Yangi bilimlarni o‘rganishga hamisha ochiq bo‘lish — bu professional sohada muvaffaqiyatga erishishning asosidir.
O‘z karyerasini boshlamoqchi bo‘lgan talabalar uchun ish tajribangizdan kelib chiqqan holda qanday asosiy yo‘nalishlarni ayta olasiz?
O‘z yo‘lingizni tanlashda murosaga kelmang:
Sizni chindan ham ilhomlantiradigan sohani tanlang va unga chuqurroq kirib boring. Universitetdagi jamoaviy loyihalar va hakatonlarda ishtirok etish sizning qiziqishlaringizni aniqlashga yordam beradi. Sizni ilhomlantiradigan yo‘nalishda siz o‘zingiz uchun qiziq bo‘lmagan yo‘nalishga qaraganda tezroq rivojlanasiz.
Savol berishdan qo‘rqmang:
Faoliyatingizning boshida aniq yoki ahmoqona ko‘ringan savollar berish mutlaqo normal holat. 4 yil davomida biror narsani tushuna olmagandan ko‘ra, atigi 5 daqiqa «ahmoq» bo‘lgan afzal. Yodda tutingki, ushbu bosqichdan o‘tgan har bir kishi ta’limning muhimligini tushunib yetadi.
Muhim ma’lumotlarni yozib olishga harakat qiling:
Ish jarayonida, sizga biror narsa haqida tushuntirish berilayotganda ularni yozib borishga harakat qiling. Iloji bo‘lsa, telefon suhbatlarni yozib olish uchun ruxsat so‘rang. Takroran berilgan savollardan ko‘ra qo‘pol savollar afzalroqdir va diqqat bilan ma’lumotlarni qayd qilish yangi tushuncha va muammolarni tezroq o‘zlashtirishingizga yordam beradi.
