Qayd etilishicha, Islom Karimov nomidagi Toshkent xalqaro aeroportida uchib kelish zali keng koʻlamli rekonstruksiyasining birinchi bosqichi yakunlandi va zalning yangilangan oʻng qismi foydalanishga topshirildi. Zalning umumiy maydoni kengaytirildi, avtotransport va avtobuslar uchun yangi yoʻlak qurildi, 120 oʻrinli avtoturargoh tashkil etildi va yashil hudud barpo etildi.

Bino fasadining kengayishi uchib kelish zali maydonini 2100 kv.m ga oshirish imkonini berdi. Natijada bojxona hududi kengaytirildi, qoʻshimcha yuk karuseli oʻrnatildi, terminal ichida kutib oluvchilar uchun ilk bor 120 oʻrindiqli hudud tashkil etildi.

Kutib oluvchilar maydonidan tashqari, qisqa muddatli toʻxtash uchun zalga tutashgan maxsus ajratilgan yoʻlak ochildi. Endi zal oldiga taksida ham, shaxsiy avtomobillarda va avtobuslarda ham kirish mumkin — yoʻlakda turish vaqti joʻnab ketish zalidagi yoʻlak kabi 10 daqiqani tashkil etadi.

Rekonstruksiyaning ikkinchi bosqichini 2025-yil oxirigacha yakunlash rejalashtirilgan. Uning davomida qoʻshimcha yuk tashish kamarini oʻrnatish, kafelar, doʻkonlar va boshqa xizmatlar joylashgan kutib oluvchilar hududini kengaytirish nazarda tutilgan.

Yakuniy bosqich — kelish va joʻnash zallarini yagona terminal majmuasiga birlashtirish. Ishlar yakunlangach, terminalning umumiy maydoni 10 000 kv.m dan oshadi, oʻtkazish qobiliyati esa soatiga 2400 yoʻlovchiga yetkaziladi.