Жаңа жөнелистиң презентациясы Ҳиндстанның Хайдарабад қаласында Өзбекстан елшиханасы, авиакомпания ўәкиллери, сондай-ақ, еки мәмлекеттиң туристлик ҳәм исбилерменлик жәмийетшилигиниң 120 дан аслам ўәкиллериниң қатнасыўында өткерилди, деп хабар бермекте "Дунё" МА.

Илажда Өзбекстан-Ҳиндстан қатнасықлары жедел раўажланып, кең көлемли стратегиялық шериклик дәрежесине көтерилгени атап өтилди.

Өзбекстан елшиси Сардор Рустамбаев Ташкент-Хайдарабад рейсиниң жолға қойылыўы Ҳиндстан Бас министриниң 29-30-август күнлери Ташкентке сапары ўақтында ерисилген келисимлердиң тиккелей әмелге асырылыўы екенин атап өтти.

Атап өтилиўинше, рейслер ҳәптесине еки мәрте «Airbus A320neo» самолётларында әмелге асырылады. Ҳайдарабад «Centrum Air» ушын Ҳиндстанның Делиден кейинги екинши жөнелиси болады.

Презентацияда Өзбекстанның туризм потенциалы, мийманхана инфраструктурасы ҳәм дем алыў орынлары да таныстырылды. Кейинги бес-алты жылда Ҳиндстаннан туристлер саны бир неше есеге артқаны атап өтилди.

Буннан соң еки мәмлекеттиң туристлик компаниялары арасында В2В ушырасыўлары болып өтти, онда Ҳиндстан ўәкиллери Өзбекстан тәрепи менен бирге ислесиўди кеңейтиўден мәпдар екенлигин билдирди ҳәм тийисли келисимлерге еристи.