"Өзбекнефтьгаз" баспасөз хаткериниң мәлим етиўинше, излеў-бураўлаў жумыслары "Өзнефть бурғылаў жумыслары" ЖШЖ тәрепинен усы жыл 5-август күни басланған. Қудық қысқа мүддетте 3159 метр тереңликке шекем бурғыланған.
"Өзбекгеофизика" АЖ қәнигелери тәрепинен өткерилген сынаўларда қудықтың 2842-3001 метр аралығындағы карбонат жатқызықларынан санаат көлеминде тәбийғый газ ҳәм конденсат ағымы алынған.
Ҳәзирги ўақытта қудықтағы өнимдар қатламлардың коллекторлық өзгешеликлерин анықлаў ҳәм олардың имканиятларын баҳалаў бойынша геологиялық изертлеўлер алып барылмақта. Бул жумыслар кәнниң перспективаларын тереңирек үйрениў ҳәм кейинги басқышларды белгилеўге қаратылған.
Сынақ жумыслары жуўмақланғаннан соң, тәбийғый газ 15-октябрьден баслап тутыныўшыларға жеткерип бериў ушын қайта ислеўге жиберилиўи белгиленген.
Сондай-ақ, жылдың ақырына шекем бул кәнде екинши излеў қудығын бураўлаў режелестирилген. Бул майданның геологиялық дүзилиси ҳәм углеводород потенциалын және де кеңирек үйрениў имканиятын береди.
