Мағлыўмат ушын: Өзбекстанның миллий тәбийғый мийрас объектлери төмендеги түрлерге бөлинеди:
- биологиялық - жасы 50 ҳәм оннан асқан тереклер, реликт тоғайлар, қымбат баҳалы терек түрлерине ийе тоғайлар, тәбийғый ландшафтлар ҳәм экосистемалар, пүткил жер жүзилик биосфера резерватлары, Рамсар конвенциясы объектлери, дыққатқа ылайық тәбийғый аймақлар, мәўсимлик тәбийғый ҳәдийселер, қатаң шекленген аймақлар (өсимликлер ҳәм ҳайўанлардың өсетуғын ҳәм жасайтуғын әҳмийетли орынлары, тийкарғы орнитологиялық аймақлар, биологиялық ҳәр түрлилик дәрежеси жоқары аймақлар);
геологиялық - геологиялық кесимлер, геоморфологиялық объектлер, тәбийғый геологиялық структуралар, глобал геопарклер, физиографиялық дүзилмелер, емлеў ресурслары ямаса шөгиндилер кәнлери, тәбият естеликлери;
- гидрологиялық - тәбийий суў бассейнлери, сарқырамалар, булақлар, көллер ҳәм дәрьялар;
- палеонтологиялық - әййемги тиришилик формаларының қалдықлары.
Режеге муўапық, Өзбекстанның миллий тәбийғый мийрасы объектлерине қорғалатуғын аймақ статусы бериледи. Бул объектлер Пүткил жер жүзилик мәдений ҳәм тәбийғый мийрас дизимине, Рамсар конвенциясы объектлери дизимине, сондай-ақ, пүткил жер жүзилик биосфера резерватлары ҳәм глобал геопарклер тармағына киргизилиўи мүмкин.
Сондай-ақ, миллий тәбийий аймақлар дизимине мәмлекетлик қорықханалар, комплексли (ландшафт) буйыртпа қорықханалары, тәбият бағлары, мәмлекетлик буйыртпа қорықханалары, мәмлекетлик тәбият естеликлери, сондай-ақ, мәмлекетлик биосфера резерватлары киргизиледи.
Тәбийий объект Өзбекстанның миллий тәбийий мийрас объектлери дизимине киргизилиўи ушын ол төмендеги талапларға жуўап бериўи керек:
биофизикалық процеслер ҳәм рельеф формаларының өзине тәнлиги ҳәм сақланып қалыўы;
тәбийий өз ара байланыслардың барлық ямаса көпшилик тийкарғы элементлериниң тәбийий жағдайда болыўы;
экосистемалар ҳәм биокөптүрлиликти узақ мүддетли сақлаў ушын әҳмийетке ийе болған тәбийғый процесслердиң барлық зәрүр элементлерин қамтып алыў;
биологиялық ҳәр түрлиликти, соның ишинде, тийисли биогеографиялық регионлар ҳәм экосистемалар ушын характерли болған флора ҳәм фаунаның жасаў орынларын сақлап қалыў көзқарасынан әҳмийети;
көшип жүриўши түрлердиң жасаў, көбейиў ҳәм уялаў орынларының, сондай-ақ олардың көшиў жолларының бар екенлиги;
биологиялық көп түрлилик ҳәм инсан өмири ушын әҳмийетке ийе болған гидрологиялық объектлердиң бар екенлиги;
Жердиң раўажланыў тарийхын сәўлелендириўши геологиялық кесимлер ҳәм структуралар, геоморфологиялық объектлер, палеонтологиялық шөгиндилер ҳәм пайда болыўлар, сондай-ақ, емлеў ресурслары кәнлери ямаса шөгинди аймақлардың бар болыўы.
Режеге муўапық, Өзбекстанның миллий тәбийғый мийрас объектлеринде тәбийғый ресурсларды қазып алыў, өсимлик ҳәм ҳайўанат дүньясына зыян жеткериў, нызамсыз қурылысларды әмелге асырыў, терек ҳәм путаларды кесиў, гидрологиялық ҳәм гидрогеологиялық режимди өзгертиўши ҳәрекетлер, топырақ эрозиясы, жол ҳәм инженерлик-коммуникация жумысларын әмелге асырыў қадаған етиледи.
Сондай-ақ, шығындыларды сақлаў ҳәм көмиў, ақаба суўларды шығарыў, зәҳәрли химиялық элементлерди қолланыў, өлген малларды көмиў орынларын шөлкемлестириў, зәҳәрли химиялық элементлер ҳәм минерал төгинлерди сақлаў ушын қоймаханалар қурыў, химия, целлюлоза-қағаз ҳәм металлургия санааты кәрханаларын жайластырыў, шарўашылық ҳәм қусшылық комплекслерин жайластырыў, суўғарыў ушын суйық тезектен пайдаланыў, транспорт қуралларын тоқтап турыў, оларға жанылғы қуйыў, жуўыў ҳәм оңлаў, нефть өнимлери қоймаханаларын шөлкемлестириў, зығыр, кендир ҳәм териге ислеў бериў, жаңа ҳәм киши түрдеги тири организмлерди климатластырыў мақсетинде интродукциялаўға жол қойылмайды.
