Бу масала Миграция агентлиги раҳбарининг АҚШнинг «Head Honchos» компанияси вакиллари билан онлайн учрашувида муҳокама қилинди.
Дастур доирасида номзодларга инглиз тили, қишлоқ хўжалиги техникасини бошқариш, ускуналарга техник хизмат кўрсатиш ва таъмирлаш, пайвандлаш ҳамда меҳнат хавфсизлиги бўйича амалий кўникмалар ўргатилади.
Иш берувчилар ўқув дастурини ишлаб чиқиш, номзодларни синовдан ўтказиш ва якуний сертификатлаш жараёнида иштирок этади. Биринчи гуруҳни АҚШдаги баҳорги қишлоқ хўжалиги мавсумига тайёрлаш мақсад қилинган.
Америкалик ҳамкорлар маълумотига кўра, АҚШ фермерларининг ўзбекистонлик ишчиларни мавсумий ишларга жалб қилишга қизиқиши ортиб бормоқда.
Иш берувчиларнинг аниқ буюртмалари олиниб, танлов мезонлари тасдиқланганидан кейин номзодларни саралаш ва тайёрлаш жараёни бошланади.
Қабул шартлари ҳамда ариза топшириш тартиби Миграция агентлигининг расмий каналларида эълон қилинади.
