Жойбардың тийкарғы мақсети - қыс мәўсиминде магистраль газ қубырларында басым төменлейтуғын Ферғана ойпатлығы аймақларындағы газ қуйыў шақапшаларын газ бенен тәмийинлеўден ибарат. Бул арқалы социаллық тараў объектлерине хызмет көрсететуғын транспорт қураллары, халықтың жеңил автомобиллерин газ бенен үзликсиз тәмийинлеў мүмкин болады.

Жойбарды әмелге асырыў ушын Қытайдың үш ири өндирис компаниясы - Himile Mechanical Manufacturing (Shandong) Co., Ltd., Luxi New Energy Equipment Group Co., Ltd. ҳәм Xinjiang Silk Road Golden Camel Supply Chain Management Co., Ltd. менен шәртнамалар дүзилген. Ҳүжжетлерде компрессор станциясын қурыў, жоқары басым астындағы 150 көшпели контейнер, сынаў стенди жеткерип бериў, арнаўлы автотранспорт қуралларын сатып алыў нәзерде тутылған.

Қоқанд қаласында қысылған газ орнатылған көшпели контейнерлерди тасыўға мөлшерленген дәслепки 30 арнаўлы автомобилди тапсырыў мәресими болды.

Қурылып атырған компрессор станциясы тәбийғый газди суткасына 270 мың куб метрге шекем - 10 кг/см2 басымнан 250 кг/см2 басымға шекем қысып, көшпели контейнерлерге салыў имканиятын береди. Бул арқалы социаллық объектлерге хызмет көрсететуғын транспорт қураллары ҳәм халықтың автомобиллери қыс мәўсиминде тәбийғый газ бенен азы-кем тәмийинленеди.

Компрессор станциясын қурыў ушын Ферғана ўәлаятының Бешариқ районынан жер ажыратылып, қурылыс жумыслары баслап жиберилген. "Өзтрансгаз", "Өзэнергоинспекция", "Аймақлық электр тармақлары" ҳәм жергиликли ҳәкимликлер менен биргеликте инфраструктуралық шешимлер ҳәм газди тасыў схемасы белгиленди.

Мағлыўмат ушын, бир контейнер 6 мың куб метр газге мөлшерленген болып, орташа 300 жеңил автомобилге хызмет көрсетиў имканиятына ийе. Жойбардың улыўма қуўатлылығы суткасына 15 мыңға шекем автомобиллерге жанылғы қуйыў имканиятын береди.