Онда тийисли министрликлер ҳәм уйымлар, пуқаралық жәмийети институтлары, соның ишинде, мәмлекетлик емес коммерциялық емес шөлкемлер, сиясий партиялар, пуқаралардың өзин-өзи басқарыў уйымлары, ғалаба хабар қуралларының ўәкиллери қатнасты.
Атап өтилгениндей, Өзбекстанда қоршаған орталықты қорғаў ҳәм атмосфера ҳаўасының патасланыў дәрежесин азайтыў бойынша системалы жумыслар алып барылмақта. Соның менен бирге, көрилип атырған илажларға қарамастан, машқала әҳмийетлилигинше қалмақта. Қурғақшыл гүз, суў ресурсларының қысқарыўы, санаат кәрханалары ҳәм автотранспорт шығындылары, соның ишинде, Ташкент қаласында ҳәм басқа да экологиялық жақтан қәўипли аймақларда ҳаўа сапасының төменлеўине алып келди, бул болса халықтың саламатлығына ҳәм мәмлекеттиң социаллық-экономикалық раўажланыўына унамсыз тәсир көрсетпекте.
Усы мүнәсибет пенен Ҳүкимет тәрепинен автотранспорт қуралларының қоршаған орталыққа зыянлы тәсирин азайтыўға қаратылған "Экологиялық транспорт" системасын басқышпа-басқыш енгизиў бойынша қарар қабыл етилди.
Система үш басқышта енгизиледи:
2025-2027-жыллар - Ташкент қаласында;
2028-2030-жыллар - Нөкис қаласы ҳәм ўәлаят орайларында;
2031-2034-жыллар - мәмлекеттиң басқа барлық аймақларында.
Система шеңберинде автотранспорт қуралларына экологиялық стикерлер ийелериниң ықтыярлы электрон мүрәжаты тийкарында, сондай-ақ, автомобиллерди дизимнен өткериў ҳәм қайта дизимнен өткериўде биринши бийпул диагностикалық тексериў нәтийжелери бойынша бийпул бериледи. Транспорт қураллары қоршаған орталыққа тәсир дәрежесине қарап "таза", "орта" ҳәм "зыянлы" категорияларға киргизилип, жасыл, сары ҳәм қызыл реңлер менен белгиленеди.
"Орта" ямаса "зыянлы" категорияға киргизилген автотранспорт қуралларының ийелери экологиялық категориясын жақсылаў ҳәм жаңа стикер алыў мақсетинде жылына бир мәрте бийпул қайта диагностикадан өтиўи мүмкин болады.
Экологиялық зоналардың шегаралары Экология комитетиниң усыныслары тийкарында халық депутатлары жергиликли Кеңеслери тәрепинен белгиленеди. Бундай аймақларда экологиялық стикерсиз транспорт қуралларының ҳәрекети шекленеди, айырым категориядағы пуқаралар ушын болса буған кирмейди.
"Экологиялық транспорт" системасының 2034-жылға шекем басқышпа-басқыш енгизилиўи транспорт хызметин халықаралық стандартларға бейимлестириў, сапалы жанылғыға өтиўди хошаметлеў, елатлы пунктлердиң экологиялық турақлылығын жақсылаў ҳәм Өзбекстанның халықаралық имиджин арттырыў имканиятын беретуғыны атап өтилди.
