2025-жылы елшихананың консуллық бөлимине Хорватия ҳәм Сербияда жумыс ислеп атырған Өзбекстан пуқараларынан көплеген шағымлар келип түскен, деп хабар бермекте "Дунё" МА.
Мүрәжатлар талланып, надурыс жумыс бериўшилер тәрепинен ең көп тарқалған ҳуқықбузарлықлар төмендегилерден ибарат екени анықланды:
мийнет ҳақының системалы түрде төленбеўи ямаса узақ ўақыт кешиктирилиўи;
ўақтынша жасаў ҳәм жумыс ислеўге рухсатнамаларды рәсмийлестириўдеги қыйыншылықлар;
алдын төленген хызметлер ушын қайта ("еки есе" ҳәм "үш есе") төлемлер;
қосымша төлемлерге разы болмаған жағдайда жумыс бериўден бас тартыў ҳәм жерден шығарып жибериў менен қорқытыў;
нызамсыз жумысқа жайласқан пуқараларды ойлап табылған сылтаўлар менен бирден жумыстан босатып, кейин ала ислеп табылған қаржыларды төлеўден бас тартыў.
Елшихана ўатанласларымыздың ҳуқықларын қорғаў бойынша жедел илажлар көрмекте: нызамбузыўшы жумыс бериўшилер менен сөйлесиўлер алып бармақта, Хорватияның ўәкилликли уйымларына рәсмий ноталар жибермекте, сондай-ақ, суд ҳәм ҳәкимшилик процесслерде пуқараларға жәрдем бермекте.
Соның менен бирге, машқалалардың үлкен бөлеги нызамсыз ямаса ярым нызамлы шығып кетиў ҳәм нызамсыз дәлдәлшилер арқалы жумысқа орналасыў каналларынан пайдаланыўдан келип шығып атырғаны атап өтилмекте.
Бундай жағдайлардың алдын алыў мақсетинде елшихана Өзбекстан пуқараларына:
Хорватия ҳәм Сербияға тек ғана Өзбекстан Республикасы Кәмбағаллықты қысқартыў ҳәм бәнтлик министрлиги жанындағы Сыртқы мийнет миграциясы агентлигиниң әмелдеги лицензиясына ийе болған лицензияланған жеке меншик бәнтлик агентликлери арқалы жумыс ислеў ушын барыў;
тийисли лицензияға ийе болмаған физикалық тәреплерге ямаса шөлкемлерге пул қаржыларын өткермеў;
кейин ала нызамсыз жумысқа орналасыў мақсетинде туристлик, мийман ямаса басқа да жумыс ислемейтуғын визалар менен шықпаў, себеби бул ҳәкимшилик шығарып жибериўге, Шенген зонасы мәмлекетлерине кириўди 5 жылға шекемги мүддетке қадаған етиўге ҳәм жынайый жуўапкершиликке себеп болыўы мүмкин;
мийнет шәртнамасына қол қойыўдан алдын оның өзбек ямаса рус тилине аўдармасын талап етиў ҳәм барлық шәртлерди, әсиресе жумыс ислеўге ҳәм жасаўға рухсат алыўға байланыслы шәртлерди дыққат пенен үйрениў;
ҳәр қандай машқалалар (айлық мийнет ҳақының кешиктирилиўи, қәўип-қәтерлер, нызамсыз жыйымлар ҳәм басқалар) жүзеге келгенде, Өзбекстан Республикасының Венгриядағы елшиханасының консуллық бөлимине (+36 304 362 636) қыстаўлы байланыс телефоны ямаса hungary.mfa.uz/page/28447 рәсмий веб-сайтында көрсетилген мессенжерлер арқалы мүрәжат етиў.
Елшихана пуқараларды мийнет миграциясы каналларын таңлаўда максимал дәрежеде сергек болыўға шақырады. Тек ғана нызамлы жумысқа жайласыў Өзбекстан пуқараларының сырт елдеги ҳуқықлары менен нызамлы мәплериниң исенимли қорғалыўын тәмийинлейди.
