Ҳүкиметтиң 2026-жыл 19-октябрьдеги 577-санлы қарары менен Медицина ҳәм фармацевтика хызметкерлерин мәмлекетлик дизимнен өткериў тәртиби ҳаққындағы реже тастыйықланды.
Қарарға муўапық, мәмлекетлик дизимнен өтпеген шахслардың тийисли қәнигелик бойынша медициналық ямаса фармацевтика кәсиплик жумысы менен шуғылланыўы қадаған етиледи.
Мәмлекетлик дизимнен өткериў ўәкиллиги Медицина ҳәм фармацевтика хызметкерлериниң маманлығын баҳалаў орайына жүкленеди.
2027-жыл 1-июльден 2030-жыл 1-январьға шекем медицина ҳәм фармацевтика хызметкерлери қәнигелиги бойынша ықтыярлы тәртипте мәмлекетлик дизимнен өткериледи. Бул арнаўлы имтихан нәтийжелери тийкарында ямаса маманлық категориясын бериў процесинде автоматикалық түрде әмелге асырылады.
Қәнигелиги бойынша кеминде 20 жыллық жумыс стажы ҳәм илимий дәрежеге ийе хызметкерлер арнаўлы имтихансыз мәмлекетлик дизимнен өткериледи. Бирақ мүрәжат сәнесине шекем өз қәнигелиги бойынша үш жыл ямаса оннан көбирек ўақыт даўамында үзликсиз кәсиплик жумыс алып бармаған хызметкерлер буған кирмейди.
Мәмлекетлик дизимнен өтиў ушын Мәмлекетлик хызметлер орайлары, Бирден-бир интерактив мәмлекетлик хызметлер порталы ямаса Медициналық қәнигелик платформасы арқалы мүрәжат етиў мүмкин.
Электрон арзалар дем алыс ҳәм байрам күнлерине қарамастан, суткасына 24 саат даўамында жиберилиўи мүмкин.
Ўәкилликли уйым сораўнаманы бес жумыс күни ишинде үйренип, талабаны арнаўлы имтиханға қойыў ямаса қоймаў ҳаққында қарар қабыл етеди.
Мәмлекетлик дизимнен өткенлиги ҳаққындағы гүўалық электрон түрде рәсмийлестириледи. Оның ҳақыйқыйлығын Медицина ҳәм фармацевтика қәнигелериниң бирден-бир электрон реестри арқалы тексериў мүмкин. Гүўалықтың қағаз түриндеги түп нусқасы ямаса дубликаты берилмейди.
Мәмлекетлик дизимнен өткен хызметкерлер кәсиплик жумысын даўам еттириў ушын ҳәр бес жылда қайта дизимнен өтиўи керек.
Қарар рәсмий жәрияланған күннен баслап үш ай өткеннен соң күшке киреди.
