Нақ пул түсимлери ҳәм терминал арқалы есап-санақларды есапқа алған ҳалда жәми пул түсимлери 1 триллион 75 миллиард сумға жетти, бул 2024-жылға салыстырғанда 28 процентке көп. Терминаллық операциялар, соның ишинде, мобил қосымшалардың үлеси 40 проценттен 43 процентке, саўда ҳәм хызмет көрсетиў тараўларында 44 проценттен 48 процентке артты.
Банклер арқалы улыўма нақ пул айланысы 1 250 триллион сумды қурап, оның түсимлери 615 триллион сумға, шығарылыўы болса 635 триллион сумға жетти ямаса өткен жылға салыстырғанда 24 процентке өсти. Түсимлердиң тийкарғы өсиўин банк хызметлери, саўда ҳәм төлемли хызметлер тәмийинледи, шығарыўдың көбейиўи болса карталардан қаржыларды жедел алыў, сырт ел валютасын сатып алыў ҳәм депозитлерден пул шешип алыў менен байланыслы.
Банк карталарына өткерилген пул көлеми 1,4 есеге өсип, 279 триллион сумды қурады, бул халықтың дәраматларының өсиўин сәўлелендиреди. Түсимлер ҳәм нақ пул бериў арасындағы айырмашылықты Орайлық банк қосымша эмиссия арқалы қаплады: 16,8 трлн сум айланысқа киргизилди.
2026-жылдың басында нақ пуллардың пул массасындағы үлеси 18,1 процентке шекем төменлеп, 2025-жылғы дәрежеден 1,1 процентлик пунктке азайғаны нақ пулсыз есап-санақларға басқышпа-басқыш өтилип атырғанынан дәрек береди.
Айланыстағы банкнотлардың саны 2,45 млрд. данаға жетти. 200 мың сумлық купюралардың үлеси көбейди, 100 мың сумлық банкнотлардың көлеми болса ески үлгилердиң алмастырылыўы мүнәсибети менен қысқарды. Пул қатарын жаңалаў бағдарламасы даўам еттирилди: алдынғы эмиссиялардағы 5 мың, 10 мың, 50 мың ҳәм 100 мың сумлық купюралардың үлеси сезилерли дәрежеде азайды.
Нақ пулларды қайта бөлистириўди оптималластырыў ҳәм Орайлық банктиң касса операцияларындағы қатнасын азайтыў мақсетинде "Электрон нақ пуллар" платформасынан пайдаланылды. 2025-жылы платформаға 922 пайдаланыўшы қосылып, орташа айлық операциялар көлеми 15 триллион сумға жетти, бул болса нақ пул айланысының ашық-айдынлығы ҳәм нәтийжелилигин арттырды.
