Президентимиз 5-декабрь күни "Турақлы энергетика - Жаңа Өзбекстанның келешекке исенимли қәдеми" атамасындағы конференцияда шығып сөйлеп, елимиздеги тийкарғы ўазыйпалардан бири - заманагөй, экологиялық таза ҳәм қайта тиклениўши энергия дәреклери есабынан тутыныўшыларды энергия ресурслары менен тәмийинлеў екенин атап өтти. Қуяш ҳәм самал генерациясын раўажландырыў турақлы ҳәм қәўипсиз энергетикаға өтиўдиң тийкарғы элементи сыпатында қаралмақта.

Бүгинги күнде Өзбекстанда улыўма орнатылған қуўатлылығы 5 582 мегаватт болған қуяш ҳәм самал электр станциялары жумыс алып бармақта. Олардың жедел жумысы үлкен экологиялық ҳәм экономикалық нәтийжеге ерисиў имканиятын берди.

"Жасыл" энергияны енгизиў ҳәм оннан пайдаланыў есабынан:

2,7 миллиард куб метр тәбийғый газ үнемленген;

атмосфераға 4,4 млн тонна зыянлы газлер шығыўының алды алынды.

Ең әҳмийетлиси, усы жылдың басынан 8-декабрь саат 17:00 ге шекем Өзбекстандағы барлық гидро, қуяш ҳәм самал электр станциялары тәрепинен ислеп шығарылған электр энергиясының улыўма көлеми 16 млрд кВт.саатты қураған.

Салыстырыў ушын, бундай көлемде жылына 6,6 миллион шаңарақтың тутыныўы тәмийинлениўи мүмкин, бул болса мәмлекеттиң энергетика тараўында жүз берип атырған өзгерислердиң көлемин көрсетеди.