Өзбекстан ҳәм Франция арасында билимлендириў тараўындағы өз-ара байланысларды беккемлеў, Франция университетлериниң билимлендириў бағдарламалары тийкарында кадрлар таярлаў мақсетинде Өзбекстан-Франция университети шөлкемлестирилмекте.
2025-жыл 12-март күни Өзбекстан ҳәм Франция ҳүкиметлери арасында бирге ислесиў ҳаққындағы келисимге қол қойылды, онда төмендегилер нәзерде тутылған:
Өзбекстан тәрепинен Жоқары билимлендириў, илим ҳәм инновациялар министрлиги ҳәм Франция тәрепинен Жоқары билимлендириў, изертлеўлер ҳәм космос министрлиги Университет шөлкемлестириўшилери есапланады;
Университетти шөлкемлестириў ҳәм оның жумысын жүргизиў процесинде Франция университетлериниң консорциумы қатнасады. Пуатье, Ренна, Гавр, Нормандия ҳәм Люмьер Лион 2 университетлери коньсорциум қурамына киргизилген.
Консорциум ўазыйпалары:
Университетте билимлендириў процесин шөлкемлестириў, оқыў режелери, бағдарламалар ҳәм материалларды ислеп шығыў, сондай-ақ, студентлерди қабыл етиў ҳәм педагогларды таңлап алыў процесслерине көмеклесиў;
Университет студентлери ҳәм профессор-оқытыўшыларын Францияға жибериў ушын қаржыландырыў дәреклерин анықлаў;
Университет студентлери ушын олардың мағлыўматлар базаларынан, соның ишинде, китапхана фондының электрон базасынан пайдаланыў тәртибин әпиўайыластырыў;
Университеттиң билимлендириў бағдарламаларын Франция Республикасында аккредитациядан өткериўге жәрдемлесиў.
Университеттиң ҳәкимшилик-финанслық мәселелер бойынша қарарлары оның Қәўендерлик кеңеси тәрепинен қабыл етиледи, оның қурамы теңлик тийкарында Өзбекстан ҳәм Франция тәрепинен қәлиплестириледи.
Университетке қабыллаў параметрлери, төлемли-контракт муғдары, оқыўға қабыллаў ҳәм питкериўшилерди аттестациядан өткериў тәртиби Университеттиң Қәўендерлик кеңеси тәрепинен белгиленеди.
Университетте басланғыш басқышта магистратурада, кейин ала басқышпа-басқыш бакалавриат ҳәм докторантурада кадрлар таярлаў, сондай-ақ, университетке кириў ушын таярлық курслары енгизилмекте.
Университетте билимлендириў процеси мақсетли мәмлекетлик грант, сондай-ақ, төлемли-контракт тийкарында әмелге асырылады.
Университет питкериўшилерине Университет дипломы ҳәм (ямаса) билимлендириў бағдарламалары Франция Республикасында аккредитациядан өткен Францияның тийисли университетиниң консорциум қурамына киргизилген дипломы бериледи. Бунда питкериўшилерге берилген диплом Өзбекстан Республикасында тән алынады.
Университет жумысын қаржыландырыў дәреклери:
Университетке оқыўға қабыл етилген студентлердиң улыўма санының 30 процентинен аспаған бөлегин мәмлекетлик грант тийкарында оқытыў ушын Жоқары билимлендириў, илим ҳәм инновациялар министрлигине ажыратылатуғын Мәмлекетлик бюджет қаржылары;
студентлерди төлемли-контракт тийкарында оқытыўдан түсетуғын қаржылар;
Университетте таярланатуғын қәнигеликлер бойынша магистр кадрларға зәрүрлиги болған жоқары оқыў орынларының бюджеттен тысқары қаржылары;
грантлар, қайырқомлық жәрдемлери ҳәм нызам ҳүжжетлери менен қадаған етилмеген басқа да дәреклер.
Ҳүжжет Нызамшылық мағлыўматлары миллий базасында жәрияланған ҳәм 26.11.2025-жылдан күшке кирди, деп жазады «Norma».
