Онда жазыўшылар, шайырлар, әдебияттаныўшы илимпазлар ҳәм кең жәмийетшилик ўәкиллери қатнасты. Аўқам баслығы Сирожиддин Саййид жыйналғанларды 1-декабрь – Қарақалпақстан Республикасының “Мәмлекетлик тил ҳаққында”ғы нызамы қабыл етилгениниң 35 жыллық байрамы менен қызғын қутлықлады. Мәмлекетимизде алып барылып атырған реформаларда басқа да тараўлар қатарында ана тилимизди сақлаў ҳәм раўажландырыў бағдарында кең көлемли жумыслар әмелге асырылмақта. Өткен дәўирде қарақалпақ тилин буннан былай да байытыўға мәмлекетлик сиясат дәрежесинде итибар қаратылып атырғаны атап өтилди.Атап айтқанда, қарақалпақ тилиндеги жаңа сабақлықлар менен қолланбалардың, көркем-әдебий китаплардың басып шығарылып атырғаны, илимий әнжуманлар ҳәм басқа да илажлардың шөлкемлестирилип атырғаны, Нөкис қаласында Ибрайым Юсупов атындағы қарақалпақ тили ҳәм әдебияты пәнин терең үйретиўге қәнигелескен дөретиўшилик мектебиниң ашылғанын атап өтиў мүмкин. Жазыўшылар қыябанында қарақалпақ шайыр ҳәм жазыўшыларының естеликлериниң орнатылыўы кеўиллерге мақтаныш сезимлерин инәм етеди. Илажда шығып сөйлегенлер ана тилимизди буннан былай да раўажландырыў, миллий үрп-әдет ҳәм қәдириятларымыздың абырайын буннан былай да арттырыў ҳәм оларды кеңнен үгит-нәсиятлаў, жас әўладты ўатансүйиўшилик, миллий дәстүрлеримизге садықлық руўхында тәрбиялаўда әҳмийетли орын ийелейтуғынын атап өтти. Байрам илажында Өзбекстан ҳәм Қарақалпақстан халық артисти Жеңисбек Пиязов тәрепинен атқарылған қосықлар жыйналғанларға заўық бағышлады.