Сапар даўамында нефть министри ҳәм Kuwait Petroleum Corporation баслығы Тарек Сулайман Ал-Румий ҳәм саўда ҳәм санаат министри Халифа Ал-Асқар менен ушырасыўлар өткерилди.
Тәреплер нефть-газ ҳәм нефть-химия, логистика ҳәм саўда тараўларында бирге ислесиў, Өзбекстан авиакомпаниялары ушын авиажанылғы жеткерип бериў, мийўе-овош өнимлериниң экспортын кеңейтиў, стандартларды өз-ара тән алыў ҳәм лабораторияларды аккредитациялаў мәселелерин додалады.
Электр, суў ресурслары ҳәм қайта тиклениўши энергетика министри, Қаржы министри ўазыйпасын атқарыўшы ҳәм Экономикалық мәселелер ҳәм инвестициялар бойынша министр ўазыйпасын атқарыўшы доктор Сабих Абдулазиз Ал-Мухайзим менен ушырасыўда инвестициялық бирге ислесиўди тереңлестириў перспективалары, еки тәреплеме саўданы кеңейтиў, "БМШ - Орайлық Азия" раўажланыў қорын шөлкемлестириў басламасы ҳәм өз-ара пайдалы шерикликтиң басқа да бағдарларына тоқтап өтилди.
Өзбекстан - Кувейт ҳүкиметлераралық комиссиясының 2-мәжилиси шеңберинде әмелий бирге ислесиўди буннан былай да раўажландырыў ҳәм ерисилген келисимлерди әмелге асырыўдан еки тәреп те мәпдар екени тастыйықланды.
Өзбекстан - Кувейт бизнес форумы ҳәм «Made in Uzbekistan» көргизбесинде қатнасыў сапар етиўдиң әҳмийетли ўақыясы болды, онда соңғы бес жылда еки тәреплеме товар алмасыў көлеми бес еседен зыят өскени атап өтилди. Агросанаат комплекси, нефть-химия, инфраструктура, транспорт ҳәм логистика, санлы ҳәм финанслық хызметлер бирге ислесиўдиң перспективалы бағдарлары сыпатында атап өтилди.
Буннан тысқары, Кувейт бизнеси менен электрон коммерция, ислам қаржылары, қурылыс, санаат ҳәм денсаўлықты сақлаў тараўларында ушырасыўлар өткерилди. Сапар етиўдиң жуўмақлары бойынша Өзбекстан ҳәм Кувейт арасындағы экономикалық шерикликти және де тереңлестириўге тийкар жарататуғын бир қатар еки тәреплеме ҳүжжетлерге қол қойылды.
